Waxaa maanta oo ay taariikhdu tahay 16 August 2017 lagu dhaariyey Madaxtooyada Garoowe Wasiirka Wasaaradda Horumarinta Haweenka iyo Arrimaha Qoyska Maryan Axmed Cali oo kamid ahayd Golihii Wasiirada Cusbaa ee uu Madaxweynaha Puntland Dr. Cabdiweli Maxamed Cali Gaas magcaabay 6-dii August 2017 laguna dhawaaqay magcaabistooda 07 August 2017.
Munaasibadda dhaarta ayaa waxaa goobjoog ka ahaa Madaxweynaha Puntland, Madaxweyne ku xigeenka Puntland Eng. Cabdixakiin Xaaji Cabdullahi Cumar Camey iyo saraakiil ka tirsan Madaxtooyada Puntland.
Dr. Cabdiweli Maxamed Cali Gaas ayaa dhaarta kadib kula dardaarmay Wasiirka Wasaaradda Horumarinta Haweenka iyo Arrimaha Qoyska Maryan Axmed Cali inay masuuliyad gaar ah iska saarto hawlaha Qaran ee ay u qabatay shacabkeeda, isla markaana ay ka soo dhalaasho shaqooyinka baaxadda leh ee xafiiskeedu u qabto shacabka Puntland, gaar ahaan Haweenka Puntland.
Sidoo kale Madaxweynaha Puntland ayaa u sheegay Wasiirka in Wasaaradda Harumarinta Haweenka iyo Arrinta Qoyska muhiimad gaara u leeyahay Puntland iyo shacabkeeda, maadaama ay shaqadiisu tahay u adeegidda, daryeelidda, ka warqabka Waxbarashadooda iyo taakulaynta da’yarta iyo Haweenka Puntland oo iyagu laf dhabar u ah jiritaanka Puntland.
Madaxweyne ku xigeenka Dowlad goboleedka Puntland Eng. Cabdixakiin Xaaji Cabdullaahi Cumar Camey ayaa dhankiisa kula dardaarmay Wasiir Maryan Axmed Cali inay markasta ka fogaato kana feejignaato wax kasta oo shaqadeeda gaabis ku keenaya, isla markaana ay si daacadnimo ku jirto, masuuliyad ku jirto, xilkasnimona leh ay ugu adeegto dadkeeda iyo dalkeedaba.
