Kormeerka uu maanta ku tegay dhismaha cusub ee Wasaaradda caafimaadka dalka oo ku yaala agagaarka KM0 Wasiirka howlaha guud iyo dib u dhiska Xukuumadda Federaalka Soomaaliya Eng Saalax Sheekh Cusmaan ayaa waxaa uu ugu kuur galayay bilicda dhismahaasi oo hadda heer gaba gaba ah maraya .
Dhismaha xarunta cusub ee loo dhisay Wasaaradda caafimaadka oo qaab casri ah loo dhisay ayaa waxaa dowladda Soomaaliya ka gacan siiyay dowladda Sweden, iyadoo ay dhismahaan quruxda badan dhiseen Engineero Soomaali ah, waxaana uu Wasiirku ku amaanay sida waqtiga kooban ay dhismahaan ku soo dhameeyeen.
Eng Saalax Sheekh Cusmaan Wasiirka howlaha guud oo Warbaahinta Qaranka kula hadlay goobtaas kormeerka kaddib ayaa waxaa uu bogaadiyay Injineerada dhisay xaruntaan iyo cid walba oo gacan ka geysatay .
“Muddo sideed bilood ah ayay qaadatay in dhismahaan quruxda badan lagu dhameystiro runtii waxaan u mahad celinayaa dowladda Sweden oo gacan naga siisay dhismahaan, waxaa ka go’an Wasaaradeyda soo celinta bilicda dalka” ayuu yiri Eng Saalax.
Dhismaha kan dabaqa ah ayaa waxaa uu kaga duwan yahay dhismayaasha kale in loo sameeyay irdo ay ka galaan dadka naafada ah oo horay dhowr jeer u codsaday in dhismayaasha dheer dheer loo sameeyo meelo ay ka gali karaan Wasiirka Saalax ayaana mar kale uga mahad celiyay Injineerada talaabadaasi sameeyay.
“Sida aad u jeedaan dhismahaan waxaa loo sameeyay irdaha ay ka geli karaan dadka cuuryaamiinta ah horay uma jirin hadda ka dibna Wasaaradu waxa ay ka shaqeyn doontaa in dhisme kasta oo la dhisayo loo sameeyo, waa muhiim arintaani waana ku amaanayaa Injineerada garbaheyga taan ee dhisay xaruntaan” ayuu mar kale yiri Eng Saalax.
Wasiirka howlaha guud iyo dib u dhiska Eng Saalax Sheekh Cismaan ayaa waxa uu horay ugu guuleystay in uu dhiso xaruntii Wasaaradda howlaha guud, iyadoo uu gacan ka helay bulshada Soomaaliyeed tani waxaa ay noqoneysaa Wasaaradii sadaxaad ee la dhiso inta uu xilka hayo.
