Siminaarkan oo maanta loo furay shaqaalaha iyo maamulka Wasaaradda Howlaha guud iyo dib u Dhiska Xukuumadad Federaalka Soomaaliya ayaa ujeedkiisu yahay dejinta qorshaha Istraatiijiyadda shaqo ee Wasaaradda, kaasi oo ay bixin doonaan khuburo aqoon durugsan u leh arrimahaasi, wuxuuna socon doona muddo 3 maalin ah.
Munaasabadda furitaanka waxaa goob joog ka ahaa Wasiirka, Wasiir ku-xigeenka, Maamulka iyo Shaqaalaha Wasaaraddaasi, iyadoo mas’uuliyiintu ay sheegeen in ay ahmiyad siinayaan sidii loo tayayn lahaa shaqada Wasaaradda iyo shaqaalaheeda, Agaasimaha Guud ee Wasaaraddaasi Axmed Maxamed Iman oo si kooban u sharxay ujeedka tababarkan, ayaa xusay in maalmaha uu socdo tababarkan ay xoogga ku saari doonaan sidii sare loogu qaadi lahaa tayada qorshaha Istraatiijiyadda shaqo ee Wasaaradda.
Mudane Cabdi Aadan Hoosow Wasiirka Howlaha Guud iyo dib u Dhiska Soomaaliya oo la hadlay shaqaalaha ayaa sheegay in looga baahanyahay shaqaalaha in ay waxbadan faa’ideystaan si ay kaalintooda uga qaataan dib u dhiska dalkooda.
“Maalintii aan imaanayay xafiiska waxaan balan qaaday shaqo, Warka aniga shaqada ayaan ka jeclahay, Wasaaraddan waxaa ay shaqadeedi tahay in dalkaan oo dhan ay dhisto, Wakaalado badan ayaa ka baxaya, tayaynta shaqaalaha iyo agaasime waaxeedyada waa arrin aad muhiim u ah,si ay waajibaadkoodi u gutaan, shaqaalaha hadii aysan tayaysnayn waxba ma qaban karaan, qof aan wax maamuli karin oo aan tayo lahayn ma joogi karo”. Ayuu yiri Wasiir Hoosow.
Tani ayaa dhiirogelinaysaa in howlaha shaqo ee Wasaaradda ay noqdaan kuwo leh tayo sare oo loogu adeego bulshada Soomaaliyeed.
