Wasiirka Isgaarsinta iyo Teknolojiyadda Xukuumadda Federaalka Soomaaliya Mudane Jaamac Xasan Khaliif ayaa daahfuray shirka 4-aad ee Wadatashiga Wasaaradda Isgaarsiinta iyo Teknolojiyadda Soomaaliya iyo Wasaaradaha Isgaarsiinta ee Dowladaha Xubnaha ka ah Dowladda Federaalka iyo Gobolka Benaadir oo socon doono 12ka illaa 16ka Juun 2023, kaasi oo ay soo qabanqaabisay Wasaaradda Isgaarsiinta iyo Teknolojiyada Soomaaliya.
Ujeedada shirkani waxa uu ahaa in Wasaaradaha isku shaqada ah ee heer Federaal iyo dowladaha xubnaha ka ah Dowladda Federaalka Soomaaliya ay yeeshaan wadashaqayn iyo is-afgarad, waxaana ka soo qaybgalay Wasiirka Wasaaradda Isgaarsiinta iyo Teknolojiyada Soomaaliya Mudane Jaamac Xasan Khaliif, Wasiiru-Dowlaha Wasaaradda Mudane Axmed Cismaan Diiriye, Wasiir ku-xigeenka Mudane Xuseen Axmed Culusoow, Wasiirka Boostada, Isgaarsiinta iyo Teknolojiyadda ee Jubbaland Mudane Cabdirashiid Maxamed Ducaale, Wasiirka Boostada, Isgaarsiinta iyo Tiknolojiyadda ee Koonfur Galbeed, Mudane Cabdullaahi Sheekh Daahir, Wasiirka Boostada Isgaarsiinta iyo Tiknolojiyadda ee Galmudug Mudane Muxyadiin Sheekh Cabdullaahi Cismaan, Wasiirka Boostada, Isgaarsiinta iyo Tiknolojiyadda ee Hirshabeelle, Mudane Cabdifitaax Xasan Faarax, Agaasimaha Guud ee Wasaaradda Isgaarsiinta Mudane Cabdiasiis Duwane Isaaq, Maareeyaha Hay’adda Isgaarsiinta Qaranka Mudane Mustafa Yaasiin Sheekh, Lataliyeyaasha Wasaaradda, Agaasimayaasha guud iyo Agaasime Waaxeedyada Wasaaraddaha Isgaarsiinta ee heer Federaal iyo heer dowlad goboleed.
Wasiirka Isgaarsiinta Mudane Jaamac Xasan Khaliif ayaa tilmaamay in ujeedka shirka uu yahay mid xoojinayo iskaashiga iyo wadashaqaynta ka dhexeysa Wasaaradaha Isgaarsiinta heer Federaal iyo heer dowlad goboleed.
“Ujeedada shirkani waxa uu ahaa in Wasaaradaha isku shaqada ah ee heer federal iyo dowladaha xubnaha ka ah Dowladda Federaalka ay yeeshaan wadashaqayn iyo is-afgarad si loo xoojiyo shaqada Qaranka ee dalka loo hayo, waxaa idinka mahadcelinayaa sida wanaagsan ee aad shirka ugu soo qeybgasheen, waxa ayna noo leedahay mudnaan gaar ah.”. ayuu yiri Wasiir Jaamac.
Shirkaan ayaa waxa uu socon doona Muddo afarmaalmood ah, waxaana ugu danbeyn laga soo saari doonaa War-murtiyeedka is-afgaradka.
