Wasiirka Isgaarsiinta iyo Teknolojiyadda Xukuumadda Federaalka Soomaaliya Mudane Xasan Khaliif ayaa maanta kormeer ku tegey xarumo dhawr ah oo ka mid ah hantida maguurtada ah ee Wasaaradda. Xarumahaas uu Wasiirku tegey waxaa ka mid ah: Xaruntii Dugsiga Tababbarka Isgaarsiinta ee ku taal Degmada Shibis. Sidoo kale wuxuu Wasiirku soo kormeeray Xaruntii Gaadiidka ee Wasaaradda oo ku taal Degmada C/Casiis.
Wasiirka ayaa ugu dambayntii kormeerkiisa ku soo gebagebeeyey Xaruntii Hore ee Boostada oo ku taal Degmada Xamarweyne, isagoo u kuurgalayey xaaladda ay hadda xarumahaasi ku sugan yihiin, kuwaasoo ay xilligan deggan yihiin dad barakacayaal ah.
Wasaaradda ayaa ku gudajirta doorkii shaqada ee loo igmaday oo ay ka mid tahay xafidaadda iyo ka-warqabidda hantida Wasaaradda. Waxaa Wasaaradda qorsheyaasheeda ka mid ah inay dib-u-yagleesho shaqooyinkii ay xarumahaas iyo kuwo kale oo ay Wasaaraddu xilligii burburka ka hor ka hawlgeli jirtey.
Wasaaraddu oo hiigsanaysaa kana faa’iideysanaysa horumarka laga gaaray dhanka isgaarsiinta iyo Teknolojiyadda, fulineysanaya halbeegyada dowladda Dan-Qaran ayaa waxay ku talo-jirtaa in mustaqbalka ummadda Soomaaliyeed loo aasaaso adeegyo ku qotoma shaqada ay u xilsaaran tahay, kuwaasoo sidoo kalena shaqo-abuur u noqon doona jiilka hanaqaaday, si ay door weyn uga qaataan dib-u-dhiska dalka.
