Dardargelinta kordhinta dakhliga dalka iyo la dagaalanka musuqa ayaa dowladan u ah hal u dheg, si taas oo looga dhabeeyo ayaa Wasiirka Maaliyadda waxa uu maalmahan kormeero isdaba joog ah ku sameeyay ilaha dhaqaalaha sida Dekadda iyo Garoonka Diyaaradaha ee Muqdisho.
Dr. Cabdiraxmaan Ducaale Beyle, Wasiirka Maaliyadda Xukuumadda Soomaaliya ayaa kormeer howleed maanta ku sameeyay qeybta canshuuraha ee Garoonka Aadan Cadde, isagoo kulan la yeeshay madaxda iyo shaqaalaha waaxdaas.
Wasiirka oo shaqaalaha la hadlaya ayaa waxaa uu sheegay in shaqaalaha looga baahan yahay in ay ka soo dhalaalaan waajibkooda Qaran, isla markaana xuquuqdooda loo dhameystiri doono.
Waaxda furdada ee garoonka Aadan Cadde ayaa dhowaan maamul cusub loo sameeyay, iyadoo madaxda cusub ay sheegeen in ay maalintii ka soo xareeyaan qeybtaas $70,000 (todobaatan kun) halka maamulkii ka horeeyay ay keeni jireen lacag u dhaxeysa $30-40 doollar.
