Wasiirka Maaliyadda Xukuumadda Federaalka Soomaaliya ayaa magaalada Nairobi ee dalka Kenya ku soo xiray shirka hannaanka dib-u-eegista 6-aad ee Barnaamijka deyn-cafinta Soomaaliya oo ka socday magaalada Nairobi.
Shirkan oo muddo labada Todobaad ah ka socday Magaalada Nairobi ee dalka Kenya, uuna shir Guddoominayay Wasiirka Wasaaradda Maaliyadda ee Xukuumadda Federaalka Soomaaliya Mudane Biixi Imaan Cige ayaa intii uu socday waxaa diiradda lagu saaray hannaanka dib-u-eegista horumarka Maaliyadda Soomaaliya iyo wixii ka qabsoomay fulinta shuruudaha Deyn Cafinta, oo arrimaha ugu muhiimsan ay ka mid yihiin dib-u-habeynta iyo sare u qaadda dakhliga Dowladda iyo hufnaanta maamulka Maaliiyadda ee dalkeenna.
Wasiirka ayaa tilmaamay in Soomaaliya ay ka gudubtay sharuudihii laga rabay ee hannaanka Deyn cafinta, isla markaana guddiga sare ee Hay’adda Lacagta Adduunka laga filayo inay go’aan ka gaaraan bisha December ee sanadkan.
Wasiirka Maaliyadda Soomaaliya ayaa xusay in arintan ay dadaal ku bixiyeen Hay’adaha kala duwan ee dowladda, isagoo faah faahiyay muhiimadda ay ganacsatada u leedahay barnaamijka deyn cafinta, kuwaasi oo heli doono fursado maalgashi.
Mudane Biixi Iimaan Cige Wasiirka Wasaaradda Maaliyadda ee Xukuumadda Federaalka Soomaaliya ayaa sheegay in dowladdeenu ay dadaal ku bixin doonto sidii isku filnaansho dhaqaale loo gaari lahaa.
Shirkaan maanta la soo gabagabeeyay ayaa intii uu socday waxaa ka qaybgashay Wakiilka Bankiga Adduunka ee Soomaaliya, xubno ka tirsan xafiiska Bankiga ee dalalka Bariga Afkrika, qaar ka mid ah Hay’adaha Dowladda, sida Wasaaradda Maaliyadda oo hoggaanka shirka ah, Wasaaradda Qorsheynta Qaranka, Wasaaradda Cadaaladda, Wasaaradda Badroolka, Bangiga Dhexe ee Soomaaliya, Xafiisyada Madaxweynaha iyo Ra’isul Wasaaraha iyo Hey’adda Warbixinada Maaliyadda.
