Wasiirka Qorsheynta, Maalgashiga iyo Horumarinta Dhaqaalaha ee Dowladda Federaalka Soomaaliya, Mudane Maxamuud C. Sheekh Faarax (Beenebeene), ayaa magaalada Muqdisho ku qaabilay Ku-Xigeenka Agaasime Goboleedka UNDP ee Dalalka Carabta, Marina Walter. Kulankan oo ka dhacay xarunta Wasaaradda Qorsheynta, ayaa waxa uu ahaa mid muhiim u ah xoojinta iskaashiga qotada dheer ee u dhaxeeya Dowladda Federaalka Soomaaliya iyo UNDP.
Wasiirka oo ku soo dhaweeyay Marina Walter Soomaaliya iyo Wasaaradda, ayaa xusay in UNDP ay tahay saaxiib istiraatiiji ah oo muhiim u ah horumarinta Soomaaliya. Waxa uu uga mahadceliyay taageerada joogtada ah ee UNDP ay ku bixiso mashaariicda horumarinta dhaqaalaha iyo bulshadda, iyo sidoo kale ka qayb-qaadashada dib-u-habaynta Qorshayaasha Horumarinta Qaran.
Wasiir Beenebeene iyo Marina Walter ayaa diiradda saaray sidii loo dardargelin lahaa horumar waara iyo sidii loo heli lahaa dhaqaale dheeri ah oo lagu taageero mashaariicda dowladda ee la xiriira horumarinta. Waxay isku raaceen in iskaashiga joogtada ah uu fure u yahay gaarsiinta Soomaaliya guulo waaweyn oo dhinaca horumarinta ah.
Wasiirku waxa uu ku nuuxnuuxsaday in xogta ay muhiim u tahay qorsheynta iyo go’aan gaarista saxda ah. Waxa uu hoosta ka xariiqay muhiimadda ay leedahay xoojinta awoodda tirakoobka iyo xog uruurinta ee Wasaaradda Qorsheynta, si loo xaqiijiyo qorshayaal wax ku ool ah oo ku saleysan xog sugan. Waxay UNDP ka codsadeen inay sii wadaan taageerada ay ka geystaan arrintan.
Intii uu socday kulanka, Wasiirku waxa uu carabka ku adkeeyay in xilligan Xukuumadda DanQaran diiradda saareyso sidii loo soo jiidan lahaa maalgashiyo caalami ah, si loo abuuro shaqooyin looguna dhiirrigeliyo dhalinyarada. Waxa uu UNDP ka codsaday inay gacan ka geystaan hagaajinta jawiga maalgashiga iyo kobcinta dhaqaalaha dalka.
Wasiirku waxa uu si gaar ah uga hadlay arrinta barakacayaasha gudaha, isagoo xusay in Soomaaliya ay dejisay Qorshaha Qaran ee Xal-u-helidda Barakacayaasha (Solutions Pathway Action Plan) oo loogu talagalay in 1 milyan qof laga saaro xaaladda barakaca. Iskaashiga UNDP ayaa muhiim u ah fulinta qorshahan iyo gaarsiinta barakacayaasha xal waara oo kor u qaada noloshooda.
Marina Walter ayaa dhankeeda xaqiijisay in UNDP ay ka go’an tahay sii wadista taageerada ay u fidiso Soomaaliya, gaar ahaan dhinacyada horumarinta, nabad-dhisidda, iyo taageeridda barakacayaasha. Kulankan ayaa ahaa mid muhiim ah oo dhidibada u aasaya iskaashi qoto dheer oo waara oo ku saleysan yoolalka wadaagga ah ee Soomaaliya iyo UNDP.
Waxaa lagu go’aamiyay in la sii wado wada shaqeynta iyo in laga wada shaqeeyo dhammaan arrimaha istiraatiijiga ah ee lagu horumarinayo qaranka, gaar ahaan dhinacyada dhaqaalaha, maalgashiga, iyo nabadda.
