Wasiirka Qorsheynta XFS Mudane Jamaal Maxamed Xasan ayaa maanta si rasmi ah xariga uga jaray xafiiska Hay’adda Care International ee Soomaaliya, iyadoo ay goob joog ka ahaayeen Xoghayaha Joogtada ah ee Wasaardda Qorsheynta Cabdiqaadir Maxamed Aadan iyo Madaxa Hay’adda Care International.
Xafiiska Hay’adda Care International ayaa laga soo raray Kenya, taasi oo qeyb ka ah dhaqangelinta go’aan horey ay u soo saartay dowladda Soomaaliya oo ahaa in hay’adaha arrimaha Soomaaliya ka shaqeeya ay u soo guuraan Dalka.
Hay’adda Care International waxa ay ka shaqaysaa barnaamijyada Biyaha, Waxbarashada, caafimaadka, tababarada macalimiinta, bulshada Rayidka iyo horumarinta saxaafadda.
Talaabadan ayaa muujinaysa isbedelada ka jira dalka iyo sidii guud ahaan adeegyada loo qabanayo bulshada Soomaaliyeed xafiisyada qaabilsan Soomaaliya ay uga shaqeyn lahaayeen ay u soo guuraan dalka, iyadoo la ogyahay in ay ku shaqeyn jireen meel ka baxsan Soomaaliya.
Dhawaan waxaa magaalada Muqdisho laga furay xafiiska Hay’adda Socdaalka ee IOM, si howlaheeda shaqo ay uga bilowdo gudaha Soomaaliya.
