Wasiirka Wasaaradda Shaqada iyo Arrimaha Bulshada ee Xukuumadda Federaalka ah ee Soomaaliya Mudane Sadiiq Xersi Warfaa oo ku sugan magaalada Bonn ee dalka Jarmalka ayaa la kulmay mas’uuliyiin ka tirsan Wasaaradda Dhaqaalaha iyo Horumarka dowladda Federaalka Jarmalka oo uu hoggaaminayay Madaxa Bariga Africa ee Wasaaradda Dhaqaalaha iyo Horumarka dowladda Jarmalka,Niels Breyer.
Wasiir Sadiiq Warfaa iyo mas’uuliyiinta Wasaaradda Dhaqaalaha iyo Horumarka dowladda Jarmalka oo uu qeyb ka ahaa u qeybsanaha Soomaaliya ee Wasaaradda Dhaqaalaha iyo Horumarka dowladda Jarmalka ayaa ka wada-hadlay sidiiย Jarmalka uu uga caawin lahaa Soomaaliya dib u howlgallinta iskuulladii farsamada gacanta iyoย machadka SIDAM ee lagu tababbaro shaqaalaha, waxaa intaa dheer oo Wasiirka uu kala hadlay dhallinyarada Soomaaliyeed iyo sidii loogu heli lahaa shaqo abuur.
Related posts
“Waxaan mas’uuliyiinta Jarmalka u sheegnay dadaallada socda iyo sida ay noogu go’antahay dhallinyarada inay shaqooyin helaan, waxaan u bandhiggay inay gacan naga siiyaan dugsiyada farsamada sidii dib loogu howlgelin lahaa arrinta oo Jarmalku uu horay uga caawin jiray Soomaaliya.” ayuu yiri Wasiir Sadiiq Warfaa.
“Waxaa kalo aan u sheegnay shaqo abuurka inay u baahantahay shaqaalo xirfad leh, si taas loo gaarana inay gacan naga siiyaan dib u howlgalinta machadka SIDAM ee lagu tababbaro shaqaalaha.” ayuu hadalkiisa ku daray Wasiirka Shaqada.
Madaxa Bariga Africa ee Wasaaradda Dhaqaalaha iyo Horumarka Dowladda Federaalka Jarmalka,Niels Breyer ayaa soo dhaweeyay dadaallada dowladda Soomaaliya ee ku aaddan horumarinta bulshada, isagoo ballanqaaday si dhow inay ula shaqeyn doonaan Xukuumadda Soomaaliya.
Waxaa kalo uu rajo ka muujiyay si dhaqso ah inuu Jarmalka usoo celiyo doorkiisii ku aaddanaa taageerada uu dowladda Soomaaliya ka siin jiray horumarinta farsamada gacanta.
Wasiirka Shaqada iyo Arrimaha Bulshada Soomaaliya, Mudane Sadiiq Warfaa ayaa toddobaadkii u dambeeyay kullamo ku qaadanaya dalalka Switzerland iyo Jarmalka, isagoo magaalada Geneva kaga qaybgalay shir-weynaha shaqaalaha adduunka, waxaana muddo 33 sanno kaddib ay dowladda Soomaaliya ku guuleysatay inay dib ula soo laabato codeyntii ay ku lahayd ururka shaqaalaha adduunka.
