Munaasabadan oo ay soo qaban qaabiyeen rugta qorayaasha Soomaaliyeed ee dalkan Uganda ayaa marti ku ahaa Wasiirka shaqada iyo Arrimaha Bulshada ee Xukuumadda Federaalka Soomaaliya mudane Sadiiq Xirsi Warfaa ayna goobjoog ka ahaayeen Wasiirka ku-xigeenka Wasaaradda Gargaarka iyo maaraynta musiiboyinka, Guddoomiyaha Degmada Marko iyo Siihayaha Safaaradda Soomaaliya ee Uganda Mudane Cali Maxamed Maxamuud (Cali Cagabaruur), kaasi oo ay ka qeyb galeen qaar ka mid ah aqoonyahanada Soomaaliyeed, guddoomiyaasha Jaamacadaha iyo marti sharaf kale.
Mudane Sadiiq Xirsi Warfaa Wasiirka Shaqada iyo Arrimaha Bulshada ee Xukuumadda Federaalka Soomaaliya oo qudbad qiimo badan ka jeediyay munaasabada ayaa ardayda uga sheekeyay xaalka uu maraayo dalka si guud iyo fursadaha Aqoonyahanka u bananaan xiligan iyo horumarka ay Dowladda Soomaaliya ku tilaabsatay ilaa intii ay jirtay.
Gabagabadii rugta qoraayaasha Soomaaliyeed ee dalkan Uganda ayaa Siihayaha Safaaradda Soomaaliya ee Uganda ugu mahadceliyay garabsiinta Ardayda Soomaaliyeed ee dalka Uganda sida mar walba u garab siiyo ardayda una fududeeyo sidii ay kulan ula qaadan lahaayeen madaxdooda dalka mar ay soo booqdaan Dalka Uganda.
Wasiir Warfaa ayaa maalmahan magaalada Kampala u jooga shir uu ugu qayb galayay oo looga hadlayay arrimaha shaqaalaha iyo xuquuqdooda, isagoo sidoo kale kulamo la qaatay qaar ka mid ah bulshada Soomaaliyeed ee Kampala ku nool.
