Wasiirka Warfaafinta, Dhaqanka iyo Dalxiiska ee Soomaaliya mudane Cismaan Abuukar Dubbe ayaa shacabka Soomaaliyeed iyo Bahda Faniinta uga tacsiyadeeyay geerida ku timid Allaha u naxariistee Marxuum Khadra Daahir Cige oo caawa ku geeriyootay magaalada Hargeysa.
Wasiirka ayaa Alle uga baryay in uu ka waraabiyo jannadii Fardowsa ahayd, Samir iyo Immaanna uu Alle ka siiyo ehelada ay ka baxday iyo Ummadda Soomaaliyeed.
“Innaalillaaahi waa innaa ileyhi raajicuun Ilaahay ha u naxariisto fannaanaddeenii weynayd ee Khadra Daahir Cige oo caawa ku geeryootay magaalada Hargeysa. Samir iyo iimaan Rabbi ha ka siiyo ehelkeedii, asxaabteedii, bahda Fanka iyo Suugaanta iyo guud ahaan shacabka Soomaaliyeed. Aamiin”.ayuu yiri Wasiir Dubbe.
