Wasiirka Wasaaradda Warfaafinta, Dhaqanka iyo Dalxiiska ee Xukuumadda Federaalka ah Soomaaliya Mudane Daahir Maxamuud Geele ayaa cambaareeyay Qaraxyadii Argagaxisada Alshabaab ay maanta ka geysteen Muqdisho iyo Gaalkacyo.
Wasiir Daahir Maxamuud Geelle ayaa ugu horeyn Ummadda Soomaaliyeed uga tacsiyeeyay Dadkii ku nafwaayay qaraxyadaasi waxaana uu Alle uga baryay kuwa ku dhaawacmay in uu bogsiiyo.
Wasiirka ayaa bogaadiyay Ciidamada amniga oo gacanta ku dhigay dhagarqabihii waday gaariga ku qarxay Degmada Wadajir ee Gobalka Banaadir kadib markii Ciidamada amniga ay ku joojiyeen Bar-kontarol oo ku taala xaafadda kaawo-godey degmada Wadajir,halkaasi oo markii dambe uu ku qarxay dad rayid ahna ay waxyeelo kasoo gaartay.
Mudane Daahir Maxamuud Geele ayaa dhan kale ku amaanay Ciidanka sida gaarka u tababaran ee Danab, Booliska iyo Nabad usgida Soomaaliya oo mid mid u toogtay dhammaan naftood haligayaasha Al-Shabaab ee doonayay inay shacab badan ku dilaan Weerarkii ka dhacay magaalada Gaalkacyo.
Wasiirka Warfaafinta Xukuumadda Soomaaliya ayaa Shacabka Soomaaliyeed uga mahad celiyay sida ay ula shaqeynayaan Ciidamadda Amniga, isagoo ugu baaqay inay laba jibaaraan si loo ciribtiro Cadowga beegsanaya dad aan waxba galabsan.
10-Qof uu ku jiro Wadaadka Xerada mas’uulka ka ahaa oo lagu magacaabi jiray Cabdiweli Cali Cilmi Yare ayaa ku geeriyooday Weerarka Argagaxisada ay Saaka ku qaadeen xeradaasi.
