Kulanka Golaha Shacabka oo uu shir guddoominayay guddoomiyaha Golaha Shacabka Mudane Maxamed Mursal Sheekh Cabdiraxmaan,waxaa Ajebndihiisa ugu horeeya uu ahaa su’aal weydiin ku abaaran wasiirka wasaaradda warfaafinta dhaqanka iyo dalxiiska ee Xukuumadda Federaalka Mudane Maxamed Cabdi Xayir Maareeye ,waxaana ugu horeyn wasiirku uu golaha u faah faahiyay howlaha ay dalka iyo dadka u heyso warbaahinta Qaranka.
Qaar ka mid Xildhibaanadda Golaha Shacabka ayaa wasiirka weydiinayay su’aalo la xiriira shaqooyinka warbaahinta iyo sida ay wararka iyo barnaamijka guud ahaan iyo gaar wararka iyo doodaha golaha shacabka u tabiso,waxaana wasiirka Warfaafinta Mudane Maxamed Cabdi Xayir Maareeye uu goluhu uga jawaabayay su’aalaha ay xildhibaanadda weydiinayeen.
Sidoo kale wasiirka warfaafinta ayaa sheegay in ka wasaaradda ahaan ay diyaar u yihiin in ay doodaha Goluhu toos (Live) laga dhigo hadii uu guddoonka Golaha soo codsado,islamarkaana warbaahinta Qaranka u taagantahay in si siman loo tabiyo Wararka iyo doodaha golaha.
Dhinaca kale kulanka Mudanayaasha ee manta ayaa lagu sii amba qaaday Akhrinta 2-aad ee ka doodista sharciga doorashooyinka maalmihii lasoo dhaafay ay xildhibaanadda aad uga doodeen.
Guddoomiyaha Golaha Shacabka Mudane Maxamed Mursal Sheekh Cabdiraxmaan oo kulanka soo xiray ayaa sheegay in dooda Akhrinta labaad ee sharciga doorashooyinka Qaranka lasoo gaba gabeeyay,waxa uuna sidoo kale u mahad celiyay Xildhibaanadda Golaha.
