Wasiirka Waxbarashada Dowlad Goboleedka Galmudug mudane Maxamed Xaashi Dhoore ayaa socdaal shaqo ku tegay deegaanno ka tirsan Gobolka Galgaduud, kuwaasi oo uu ku soo qiimeynayay heerarkooda waxbarasho.
Mudane Maxamed Xaashi Dhoore ayaa deegaannada uu kormeerka ku tegay waxaa ka mid ah Dhagaxyaale, Biyahagaduud iyo Dabarre, kuwaasi oo dadka deegaanka oo isxilqaamay ay ka hirgeliyeen xarumo waxbarasho, si ardayda deegaannadaas ay u helaan fursado waxbarasho oo tayo leh.
“Deegaanada waxaa ka jiray baraarug iyo isku tashi aad u sarreeya oo bulshadu ay awoodda ku saareyso sidii loo horumarin lahaa adeegga bulshada sida Waxbarashada iyo Caafimaadka”.ayuu yiri Wasiirka Waxbarashada Galmudug.
Wasiirka Waxbarashada Dowlad Goboleedka Galmudug ayaa degaanka Dhagaxyaale waxa uu ka soo dhagax-dhignay iskuul uu yeelan doono deegaanka oo dhawaan la bilaabayo dhismihiisa, isagoo shacabka ugu baaqay inay ka shaqeyaan horumarinta Waxbarashada, si loo helo arday waxbarata..
Mudane Maxamed Xaashi Dhoore ayaa ugu baaqay Jaaliyadda Soomaaliyeed ee Galmudug inay u istaagaan horumarinta Waxbarashada, waxaana uu xusay in dhankooda ay joogteen doonaan u kuurgelidda goobaha Waxbarasho ee ku yaalla deegaannada Galmudug.
