Wasiiro ka tirsan dowlad Goboleedka Galmudug ayaa maanta howlo shaqo u tegay deegaanka Dhabad ee Degmada Caabudwaaq, halkaasi oo ay ka hirgeliyeen mashaariic horumarineed oo wax loogu qabanayo bulshada deegaanka.
Wasiirka Waxbarashada Galmudug mudane Maxamed Xaashi Dhowre ayaa sheegay in socdaalka ay ku tegeen Dhabad ay ku wehlinayeen Wasiirro dhawr ah oo ay ka midyihiin Wasiirka Caafimaadka Dr. Cabdiwelli Jaamac, Wasiirka Ganacsiga Cabdiladif, Wasiirka Amniga Axmed Macallin Fiqi, Wasiirka Arrimaha Gudaha Cabdi Waayeel iyo Masuuliyiin kale oo farabadan oo ay Xildhibaanno ku jiraan.
Mudane Maxamed Xaashi Dhowre oo Warbaahinta Qaranka la hadlay ayaa sheegay in uu xariga ka jaray dugsiga sare ee Dhabad, kaasi oo wax badan ka tari doono baahiyaha waxbarasho ee deegaanka ka jirta, maadaama ardayda dugsiyada sare ay kolkii hore aadi jireen Degmada Caabudwaaq, balse haatan ay arrintaas ka maarmi doonaan.
“Waxaan xariga ka jaray dugsiga Sare ee Dhabad, sidoo kalena waxaan sheedda sare ka soo eegay iskuulka Hoose Dhexe ee Alla Aamin oo goorta aan tegayay aan la joogin, balse ay arday dhigtaan”. Ayuu yiri Wasiir Maxamed Xaashi.
Wasiirka Waxbarashada Galmudug ayaa xusay in Wasaaraddu ay ka shaqeyneyso sare u qaadidda tayada waxbarasho ee deegaannada Galmudug, isagoo amaan u jeediyay ardayda wax ka barata xarumaha Waxbarashada Galmudug.
