Wasiirka Wasaaradda Waxbarshada, Hiddaha iyoTacliinta Sare ee Federaalka Mudane Faarax Sheekh Cabdiqaadir oo la kulmay qeybaha kala duwan ee Waxbarshada, ayaa Kula dar-daarmay taageridda caruurta shuhadadii ku geeriyootay weerarkii argagaxisadu ka gaysteen magaalada Muqdishu 29 Oktoobar ee lagu xasuuqay shacabka Soomaaliyeed ee aan waxba galabsan.
Wasiirka Waxbarshada Mudane Faarax Sheekh Cabdiqaadir oo la hadlay Masuuliyiinta waxbarshada dalka ayaa sheegay in sababta argagaxisada ay u weerarayaan xarumaha waxbarshada ay tahay in ay bulshada Soomaaliyeed indhaha tiraan, mustaqbalka Ubadkana ay mugdi galiyaan, isla markaana ay u soo baxaan jiil aan waxba baranin oo ay ka dhaadhicin karaan afkaartooda gurracan, dalka iyo dadka Soomaaliyeedna ay sida ay doonaan ka yeelaan, umana suura galeyso Insha Allaah.
Bahda Waxbarshada, ayaa uga mahadceliyay Wasiirka Waxbarshada doorkiisa hoggaamineed ee Tacliinta dalka, iyaga oo tilmaamay in ay diyaar u yahiin Ka qeyb qaadashada gurmadka waxbarasho ee Caruurta ay ka shahiideen walaalahii Soomaaliyeed ee ku geeriyooday weerarkii Soobe 2, iyaga oo ballan qaaday in ay siinayaan waxbarasho bilaash ah dhamaan Ardayda dhigata goobaha waxbarshada ee waalidiintoodu ku naf waayeen weerarkii argagaxiso ee 29 Oktoobar.
