Wasiirka Wasaaradda Waxbarashada Hiddaha iyo tacliinta Sare ee Xukuumadda Federaalka Soomaaliya Mudane, Cabdullaahi Goodax Barre ayaa maagalada baladweyne kulan kula qaatay bahda waxbarashada oo ay ugu Horeeyaan gudiga waxbarashada Gobalka Hiiraan.
Kulanka ayaa intii uu socday looga hadlay sidii dib u dhis loogu sameyn lahaa iskulladii ku bur buray Fatahaadii uu sameeyay Wabiga Shabelle iyo sidii ardaydii ka barakacay ay dib ugu bilaabi lahaayeen waxbarashada.
Wasiirka waxbarashada Cabdullaahi Goodax Barre ayaa sheegay in waajib gaar ah uu ka saaranyahay horumarka waxbarashada Ardayda Soomaaliyeed.
“Waxaan kulan kula qaatay magaalada Beledweyne bahda waxbarashada gobolka Hiiraan. Waxaan ka wada hadalnay sidii aan dayactir ugu sameyn lahayn xarumaha waxbarashada gobolka oo burbur xoogan uu kasoo gaaray fatahaada wabiga shabeelle oo 86 dugsi oo ka mid ah dugsiyada ku yaalla magaalada iyo tuulooyinka ku hareereysan ay xirmeen, isla markaana ay ka tageen ardaydii dhiganeysay oo ay tiradoodu dhan tahay 27,500” ayuu yiri Wasiir Goodax.
