Dhismahan oo ka kooban qeybo kala duwan una badan xafiisyo, ayaa maanta lagu wareejiyey Wasaaradda Xanaanada Xoolaha Dowlad Gobaleedka Galmudug, kadib munaasabad kooban oo ay ka qeyb galeen Guddoomiyaha Baarlamaanka Galmudug Dr. Maxamed Nuur Gacal, Wasiirka Wasaaraddaasi Mudane Maxamed Cabdi Maxamed iyo u qeybsanaha Mashruucan ee Wasaaradda Xanaanada Xoolaha, Dhirta iyo Daaqa Jamhuuriyadda Federaalka Soomaaliya (Aadan Xuseen Cige).
Xafiisyada cusub ee Wasaaradda Xanaanada Xoolaha Galmudug, ayaa lagu dhisey Barnaamijka ILED oo qeyb ka ah Mashruuca RAAISE ee fulintiisa ay laheyd Hey’adda FAO ee Qaramada Midoobay, Isla munaasabadaan, ayaa sidoo kale lagu wareejiyey qeybta sheybaarka Xoolaha ee Wasaaradda oo ay dhisme iyo qalabeynba uu ku sameeyey Mashruuca Biyoole ee Galmudug.
Aadan Xuseen Cige uu qeybsanaha Mashruucan ee Wasaaradda Xanaanada Xoolaha, Dhirta iyo Daaqa Xukuumadda Federaalka Soomaaliya ayaa tilmaamay in marxalado kala duwan uu soo maray mashruucan.
Maxamed Cabdi Maxamed Wasiirka Xanaanada Xoolaha Galmudug ayaa dhankiisa uga mahadceliyey dhinacyada gacanta ka siiyey Wasaaradda yagleelida xafiisyadan cusub, ayna diyaar u yihiin inay ugu adeegaan bulshada.
Ugu dambeyn Guddoomiyaha Baarlamaanka Galmudug Maxamed Nuur Gacal ayaa xusey in dhismaha iyo dardar galinta howlaha Wasaaradda ay qayb ka yihiin mudnaanta Galmudug ay siineyso horumarinta Xoolaha oo ah isha koowaad ee Dhaqaalaha Galmudug, isagoo kula dardaarmay Mas’uuliyiinta Wasaaradda Xanaanada Xoolaha inay dardargeliyaan waajibaadka loo igmaday.
