Shir ay si wada jir ah u soo qaban qaabiyeen Ururka Caalamiga ah ee caafimaadka xoolaha (OIE), Hay’adda Qaramada Midoobay u qaabilsan cunada iyo beeraha (FAO) iyo Ururka Midowga Afrika u qaabilsan dhanka caafimaadka xoolaha (AU-IBAR) ayaa lagu qabtay magaalada Abidjan ee xarunta dalka Ivory Coast.
Shirka ayaa waxaa ka qeyb galay Madaxa FAO Jose Graziano da Silva, Madaxa OIE Dr. Bernand Vallat, Madaxa AU-IBAR Dr. Ahmed Al-sawalhy iyo Wasiirada Xanaanada Xoolaha ee dalalka Africa iyo Asia, iyadoo kulanka uu furay Ra’iisul Wasaaraha Dalka Ivory Coast H.E Mr Daniel Kablan Duncan, waxaana Madaxda ka qeyb gashay ay gaarayaan ilaa iyo 70-dal oo ay hormuud ka haayeen Wasiirada Xanaanada Xoolaha.
Soomaaliya waxaa shirka uga qayb wafdi balaaran oo uu hogaaminayay Wasiirka Xanaanada Xoolaha, Dhirta iyo Daaqa Mudane Siciid Xuseen Ciid oo ay weheliyaan Agaasiimaha Caafimaadka Xoolaha Wasaarada Dr. Axmed Cabdi Geeddi,Drs. Xabiiba Sheekh Xasan, Drs.Nuurta Sheekh Maxamud, Dr.Maxamed Cabdi Rooble iyo Kaaliya Wasiirka Liibaan Xasan Xaaji.
Madaxa FAO Jose Graziano da Silva ayaa shirka ka sheegay in Soomaaliya ay horumar weyn ka sameysay talaalka xoolaha iyo ka hortagga cudurada ku dhaca xoolaha, isago tallaabadaasi ku tilmaamay intahay mid horumar ah.
Wasiirka Xanaanada Xoolaha ee Soomaaliya ayaa kulamo gaar gaar ah goobta Shirka kula yeeshay Madax kala duwan oo ay ugu horeeyaan Madaxda FAO iyo OIE oo si weyn uga wada hadleen sidii loo sii balaarin lahaa kaalmada Hey’adaha Caalamiga ah ku bixiyaan horumarinta Caafimaadka Xoolaha iyo Mashaariicda la xiriirta, waxay ku gaareen heshiis weyn, iyadoo lagu ballamay in la kordhiyo mashaariicda ay ka wadaan Soomaaliya,
Sidoo kale Wasiirku waxa uu halkaas kulamo muhiim ah kula yeeshay madax ka socota Bankiga Adduunka qaynta Xoolaha, Bankiga Afirka ee Horumarinta iyo Wakiilada Wadamada aan la wadaagno xiriirka Ganacsiga iyo isdhaafsiga khibradeed.
Waxaa kale oo Wasiirku si gaar ah isku arkeen wafuud ka socotay dalalka Suudaan,Cumaan, Muritaaniya, Liibiya, Masar, Moroco, DRC, Ugandha,Turkiga iyadoo dhamaan ay ka wada hadleen iskaashiga dalalkaas iyo Soomaaliya.
Gabagabadii Shirka waxaa laga soo saaray bayaan lagu xoojinayo la dagaallanka Cudurka PPR oo lagu heshiiyay in 15-ka sano ee soo socota laga cirib tiro adduunka, cudurkaani waxuu ku dhacaa ariga iyo idaha, waxaana uu khatar ku hayaa boqolaal Milyan oo qoys oo noloshoodu ku xiran tahay dhaqashada ariga, taasoo hadaan laga hortagin khatar ku ah cuntada iyo nafaqada dadweynaha aduunka, Soomaaliya si gaar ah ayaa loo aqoonsadey inay tahay goob muhiim ah oo laga ciribtiri karo cudurkaas halista ah.
Madaxa Xafiiska Warfaafinta Wasiirka X.Xoolaha
