Wasiir Wasaaradda Xanaanada Xoolaha, Dhirta iyo Daaqa ee Xukuumadda Federaalka Soomaaliya Mudane Xuseen Maxamud Sheekh Xuseen iyo Wafdii uu hogaaminayo oo maalmahaan safar shaqo ku joogay wadanka UK gaar ahaan magaalo madaxdiisa ee London, ayaa halkaasi kaga qeyb galay furitaanka shir caalami ahaa oo ay Dowlada UK marti galineysay kuna saabsanaa Ciribtirka ganacsiga sharci darrada ah ee duurjoogta.
Shirkan oo socday muddo labo cisho ah ayaa waxaa ka qeybgalay madax ka kala socotay dhowr dal si ay uga caawiyaan ka qeyb galayaasha ciribtirka ganacsiga duur-joogta sharci darrada ah iyo in la ilaaliyo noocyada duurjoogta ugu caansan dunida ee khatarta ugu jira in la dabar gooyo.
Ugu dambeyn shirkaas oo ah markii ugu horeysay oo Dowladda Soomaaliya lagu casuumo ayaa Wasiirka iyo wafdigiisaba waxay soo dhaweyn balaaran kala kulmeen Dowladda UK gaar ahaan Xoghayaha Arrimaha Dibadda iyo barwaaqo sooranka Hon. Jeremy Hunt.
Wasiirka Xanaanada Xoolaha, Dhirta iyo Daaqa ee Xukuumadda Federaalka Soomaaliya Mudane Xuseen Maxamud Sheekh Xuseen ayaa sidoo kale kulamo gooni gooni la qaatay hogaamiyeyaasha kale ee ka soo qeybgalay shirkaas, oo ay ka wada hadleen sidii Soomaaliya looga caawin lahaa ilaalinta duurjoogta.
