Wasiirkii hore ee Haweenka iyo arrimaha qoyska ee Puntland, Marwo Caasho Geelle Diiriye ayaa magaalada Gaalkacyo ka dhistay Madaraso u gaar ah gabdhaha oo lagu baranayo xifdinta qur’aanka, tafsiirkiisa iyo daruusaha diiniga ah.
Sidoo kale, salaadaha ayaa lagu ooggi doona ”Markaska” oo ku yaalla Suuqa Caasha Geelle, waxaana Caasho Geelle Diiriye ay sheegtay iney ”Waqaftay”, si Eebbe ugu dembi dhaafo nafteeda, waalidkeeda, qoyskeeda iyo walaalaheed.
”In badan baan ka soo shaqeeyay waxyaabaha kale ee kheyriga ah sida ceelasha, Iskuulada, Suuqyada iyo adeegyada kale ee bulshada, maanta waxaa nasiib inoo ah aniga, waalidkay, qoyskayga iyo walaalahay oo dhan inaan ”Waqaf” ka dhigay Madarasadan”, ayay tiri Marwo Caasha Geelle.
Maamo, Siciido Geelle Diiriye oo xaflada furitaanka Madarasada hadalo kooban ka jeedisay ayaa iyana tiri ”Aad baan ugu faraxsanahaya madarasadaan, anagu mar walba waan jecel nahay kheyrka, aabbe oo reera diineed ahaa ayaa nagula dardaarmi jiray inaan samayno”.
Gudoomiyaha haweenka gobalka Mudug, culimaa’udiinka iyo dadkii kale ee ka soo qayb galay munaasabada ayaa u mahadceliyay Marwo, Caasho Geelle Diiriye, iyaga oo ugu duceeyay in Eebbe ka ajarsiiyo, iyada oo qoyskeeda.
