Xafladan shahaadooyinka lagu guddoonsiinayay labaatan arday oo ku guuleysatay tartan ku saabsanaa ka qeyb galka haweenka ee siyaasadda oo maanta lagu qabtay magaalada Muqdisho ayaa waxaa ka qeyb galay Wasiiro ka tirsan Xukuumadda Soomaaliya, ergayga gaarka ah ee Xoghayaha Guud ee Qaramada Midoobay u qaabilsan arrimaha Soomaaliya, xafiiska Qaramada Midoobay u qabailsan arrimaha jinsiga, ururada haweenka Qaranka iyo kan gobolka banaadir, bulshada rayidka, qaar ka mid ah maamulada dalka ka jira, Jaamacada dalka, arday iyo marti sharaf kale.
Dhaq dhaqaaqa gabdhaha Soomaaliyeed ee sidii haweenka Soomaaliyeed ay uga qeyb geli lahaayeen siyaasadda dalka, ururka Midowga Ardayda Jaamacadaha magaalada Muqdisho iyo marti sharaftii kale ee kasoo qeyb galay ayaa ku dheeraaday muhiimada ay leedahay in ardayda kartida iyo dadaalka muujinaya la dhiira geliyo.
Ergayga gaarka ah ee Xoghayaha guud ee Qaramada Midoobay u qaabilsan arrimaha Soomaaliya Nicolas Key ayaa sheegay in tani ay muujineyso sida midnimada iyo dowladda Soomaaliya ay u soo laabatay, ayna dhiiri gelinayaan ardayda Soomaaliyeed ee hal abuurka leh.
Wasiirka Dhallinyarada iyo Cayaaradda Mudane Maxamed Cabdullaahi Xasan “Nuux”, Wasiirka Wasaaradda Waxbarashada iyo tacliinta sare Khadra Bashiir Cali iyo Wasiir ku-xigeenka Wasaaradda Haweenka iyo Horumarinta xuquuqul insaanka Soomaaliya Muumina Sheekh Cumar oo goobta hadalo ka jeediyay ayaa sheegay in haweenka Soomaaliyeed ay kaalin weyn ka qaateen horumarka dalka, loona baahanyahay in mar walba la taageero.
Wasiirka Warfaafinta Dhaqanka iyo Dalxiiska Mudane Maxamed Cabdi Xayir “Maareeye” ayaa tilmaamay in haweenka oo la dhiiri geliyo ay muhiimad u leedahay bulshada Soomaaliyeed.
Mas’uuliyiintii munaasabada ka qeyb galay ayaa waxa ay shahaadooyin guddoonsiiyeen ardaydii ku geeleysatay tartankii mudada dhowrka bil ah soo socday, isla markaana ardayda ay ku tar tamayeen ka qeyb galka haweenka ee siyaasadda.
Ugu dambeyn ergayga gaarka ah ee xoghayaha guud ee qaramada midoobay u qaabilsan arimaha soomaaliya ayaa Samiiro Xuseen Ducaale, Cabdiweli Cabdullaahi Xuseen iyo Faadumo Cabdi Cali oo ka mid ah dhallinyarada maanta shahaadooyinka la gudoonsiiyay u gartay inay noqdaan danjirayaasha arrimaha horumarinta Haweenka iyo sidoo kale horumarinta dhallinyarada.
