Wasiirka Wasaaradda Arrimaha Gudaha Xukuumadda Federaalka Soomaaliya Mudane Axmed Macalin Fiqi, Wasiiru-dowlaha Wasaarada Gaadiidka iyo Duulista Hawada Soomaaliya Mudane Cabdikariin Cabdow Xeydar iyo Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) ayaa ka qeybgalay kulan wada-tashi iyo Wacyigelin Bulsho oo caawa lagu qabtay Xarunta Degmada Shibis ee Magaalada Muqdisho.
Kulankaan ayaa waxaa goobjoog ka ahaa Xildhibaan Cabdiraxmaan Maxamed Maxamuud (Cagaweyne), Guddoomiye Kuxigeenka Amniga iyo Siyaasadda Gobolka Banaadir Mudane Maxamed Axmed Diiriye (Yabooh), Xoghayaha Guud ee Gobolka Banaadir Feysal Caraale Afrax, Guddoomiyeyaal Degmo, Agaasimeyaal, Odayaasha, Haweenka, Dhalinyarada iyo qeybaha kala gedisan ee Bulshada Degmada Shibis.
Guddoomiyaha Degmada Shibis Mudane Cali Axmed Cabdulle (Cali Soomaali) oo munaasabadda ka hadlay ayaa ugu horeyn Madaxda halkaasi kusoo dhaweeyay, isagooย sheegay in Bulshada Degmada Shibis ay diyaar u yihiin ka qeyb-qaadashada horumarka, dib-u-dhiska iyo bilic soo celinta Magaalada Muqdisho, la dagaallanka Maandooriyaha iyo Garan-waaga.
Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) oo Bulshada Degmada Shibis la hadlay ayaa ku booriyay dib-u-dhiska Degmada, Bilicda, sugidda Amniga, La-dagaallanka Maandooriyaha iyo in laga qeyb-qaato dagaalka ka dhanka ah Khawaarijta oo uu hormuudka u yahay Madaxweynaha Jamhuuriyadda Federaalka Soomaaliya Dr. Xasan Sheekh Maxamuud.
Ugu danbeyn waxaa Munaasabada ka hadlay Wasiirka Wasaarada Arrimaha Gudaha Xukuumada Federaalka Soomaaliya Mudane Axmed Macalin Fiqi oo bulshada Degmada Shibis ku booriyay in ay ka qeybqaataan Dib-u-dhiska iyo dagaalka ka dhanka ah kooxaha Garan-waaga, asigoo dhinaca kale ku baaqay in laga wada qeyb qaato dagaalka ka dhanka ah Kooxaha Khawaarijta ee uu hogaaminayo Madaxweynaha Jamhuuriyadda Federaalka Soomaaliya Dr. Xasan Sheekh Maxamuud.
