Wasiiro, Xildhibaanno ka tirsan Dowladda Soomaaliya, salaadiin iyo odoyaal dhaqameed ka soo jeedo deegaannada Jubbaland oo maanta kulan ku yeeshay magaalada Muqdisho ayaa ku baaqay in si deg deg oo sharuud la’aan loo joojiyo dagaalka ka soconaya galbeedka magaalada Kismaayo oo u dhaxeeya dad walaalo ah oo wada dega, waxaana gogosha maanta lagu kulmay dhigay Wasiirka Wasaaradda Gaadiidka iyo Duulista Hawada ee dowladda Soomaaliya mudane Maxamed Cabdullaahi Salaad (Oomaar).
Odoyaasha dhaqanka ayaa ka codsaday waxgaradka ku sugan Kismaayo in laga wada qeyb-qaato sidii loo damin lahaa colaadda ka soo cusboonaatay duleedka magaalada Kismaayo, isla markaana la joojiyo dagaalka micno darada ah ee dhiiga dadka Walaalaha ku qubanaya,
“Waxaan ka codsaneynaa odoyaasha dhaqanka ku sugan magaalada Kismaayo inay ka wada qeyb-qaataan sidii loo damin lahaa colaadda kasoo cusboonaatay duleedka magaalada Kismaayo “sidaas waxaa yiri qaar ka mid ah odoyaasha dhaqanka
Xildhibaan Sakariye Xaaji Cabdi oo ka tirsan Golaha Shacabka ee Barlamaanka Soomaaliya ayaa sheegay in wixii dhacay dib la iska imaan doono, hase yeeshee dagaal horleh aysan xamili karin dadku, loona baahanyahay in la joojiyo dagaalka.
“Runtii wxii dhacay gadaal ayaa looga wadahadlayaa ee hadda waxaa loo baahanyahay in la joojiyo dagaalka waxaana leenahay dadka dagaalamaya joojiya dagaalka micno darada ah”ayuu yiri Xildhibaan Sakariye,
Wasiirka Wasaaradda Gaadiidka iyo Duulista Hawada ee dowladda Soomaaliya mudane Maxamed Cabdullaahi Salaad (Oomaar) ayaa ugu baaqay dadka dagaalamaya inay ku joojiyaan si shuruud la ‘aan ah, sidoo kale waxaa fariin u diray dadka dagaalka ku buun buuninaya baraha ay ku xiriiraan bulshada inay dadka marin habaabinin oo ay joojiyaan falalka nuucaasi oo kale ah.
“Waxaan ku baaqayaa in dagaalka si sharuud la’aan ah lagu joojiyo, madaama u xilligaan dagaalka dan ugu jirin Ummadda Soomaaliyeed, sidoo kale waxaan leeyahay dadka baraha bulshada ay ku xiriiraan ku buun buuniya inay joojiyaan waayo dagaal wiil kuma dhashee wiilbaa ku dhinta”, ayuu hadalkiisa ku soo koobay Wasiir Oomaar.
