Wasiiru dowlaha Arrimaha Dibadda iyo Iskaashiga Caalamiga, Mudane Cabdulqaadir Axmed-kheyr Cabdi, ayaa maanta saxiixay buugga tacsida ee ka furan Safaaradda Jamhuuriyadda Kenya ee Muqdisho, lana xiriira geerida Madaxweynihii hore ee Kenya Daniel Toroitich Arap Moi.
Wasiiru dowlaha ayaa qoray “Kenya waxa ay weyday mid ka mid ah hoggaamiyeyaasheeda siyaasadeed ee taariikhda leh, ahaana Madaxweynaheedii labaad iyo mid ka mid ah raggii dowlad-yaqaanka ahaa ee la hana-qaadday dhidiba-u-taagiddii Jamhuuriyad madax bannaan”.
Markii uu Wasiiru dowlaha Arrimaha Dibadda iyo Iskaashiga Caalamiga uu gaaray dhismaha Safaaradda Kenya waxaa halkaasi ku soo dhoweeyay Safiirka Kenya u qaabilsan Jamhuuriyadda Federaalka Soomaaliya, Jeneraal (Howlgab) Lucas Tumbo.
Madaxweynihii hore ee Kenya Daniel arap Moi oo da’diisu ahayd 95 sano-jir ayaa ugu geeriyooday xanuun aan la qeexin isbitaal gaar ah oo ku yaalla Caasimadda Nairobi 4 February, 2020, waxaana lagu tiriyaa inuu ahaa Madaxweynihii ugu waqtiga dheeraa xukunkiisa dalka Kenya oo 24 sano uu talada hayay illaa uu iskaga degay kursiga sanadkii 2002.
