Wasiiru-dowlaha arrimaha Gudaha iyo Federaalka ee Xukuumadda Soomaaliya Mudane Cabdullaahi Faarax Wehliye ayaa cambaareeyay falkii wuxuushnimada ahaa ee lagu burburiyey xarunta shirkadda Hormuud ee Degaanka Cali Buulley oo ku dhow Degmada Dhoobley ee Gobalka Jubada Hoose.
Mudane Cabdullaahi Faarax Wehliye ayaa uga tacsiyadeeyay howlwadeena Hay’adda Hormuud iyo shacabka Soomaaliyeed dhibka nafeed iyo midka dhaqaale ee kasoo gaaray falka xanuunka badan ee lagula kacay shirkadda, waxaana uu xusay in arrintaas baaritaan lagu sameyn doono, si loo ogaado cidda ka dambeysay falka lagu bur buriyay shirkadda Hormuud.
“Dowladda Soomaliyeed guud ahaan gaar ahaan hay’adaha sida gaarka ah ugu shaqada leh ka falcelinta dhacdooyinkaan waxay ka shaqeynayaan la xisaabtanka dhinacyada ka dambeeya ama ku lugta leh falalkaan guracan ee lagu cuuryaaminayo ilaha dhaqaalaha ee dalka iyo hantida dadweynaha”.ayuu yiri Wasiiru dowlaha Wasaaradda Arrimaha gudaha.
Wasiiru dowlaha ayaa shacabka Soomaaliyeed ugu baaqay inay muujiyaan deganaan iyo dulqaad inta laga shaqeynayo xal u helista dhibka soo noqnoqday.
Sida la ogsoonyahay xarunta ayaa nooqneysa tii 7aad ee la burburiya tan iyo sanadkii sanadkii hore 2018.
