Xili uu soo laba kacleeyey xanuunka COVID 19, isla markaana wasaaradda caafimaadka Galmudug ay xaqiijisay in 6 kiis oo xanuunka qaba laga helay magaalada Gaalkacyo ayaa waxaa kormeer ku tagay isbitaalka magaalada gaalkacyo wasiiru dowlaha wasaaradda caafimaadka Axmed Mire Faafale, Wasiir ku xigeenka wasaaradda DR. Mahad Caabi Ciise iyo duqa degmada Gaalkacyo Cabdiraxmaan Sheikh Xasan, kuwaas oo u kuurgalayay u diyaar garowga la tacaalidda xanuunka.
Mas’uuliyiintaan oo uu isbitaalka ku soo dhaweeyey isku duwaha wasaaradda caafimaadka ee gobolka Mudug Liban Cabdiqaadir iyo agaasimaha isbitaalka Dr Maxamed Cabdi, kuwaas oo kormeer Ku soo sameeyey qeybta loogu talo galay la tacaalidda xanuunkan ayaa waxaa warbixin ka siiyay mas’uuliyiinta wasaaradda caafimaadka Dr. Maxamed Cabdi agaasimaha isbitaalka.
Duqa degmada Gaalkacyo Cabdiraxmaan Sheikh Xasan ayaa sheegey in maamulka degmada uu doorkiisa ka qaadanayo sidii la isaga kaashan lahaa ka hortagga xanuunka isla markaana bulshada uu ka codsanayo inay dhaqan galiyaan fariimaha bahda caafimaadka.
Wasiiru dowlaha wasaaradda caaafimaadka Axmed Mirre Faafaale ayaa xusey in dowladda Galmudug ay dadaal badan ku bixinayso xakamaynta cudurka COVID 19 isla markaana bulshada looga baahan yahay inay yareyaan kulamada aan muhiimka ka ahayn si loo yareeyo saamaynta cudurka.
