Wajiga 3aad ee doorashooyinka Aqalka Hoose ayaa maanta lagu wadaa inay ka bilaabato magaalada Baydhabo ee xarunta Gobolka Baay, kaasi oo ah wajiga ugu dambeeya ee doorashada xubnaha aqalka Hoose.
Guddiga Doorashooyinka heer Dowlad goboleedka ee Koonfur galbeed Soomaaliya ayaa sheegay in bartamaha todobaadkan ay soo gabo gabeyn doonaan guud ahaan doorashooyinka xubnaha Aqalka Hoose ee dalka.
“Waxaan ku guuleysanay doorashada 49 kursi oo ka mid ah kuraasta aqalka Hoose ee Koonfur Galbeed ku soo aaday, kuwaasi oo iminka inoo harsanyihiin 20 kursi, waxaana rajeyneynaa in Ilaa iyo Taladaada ay noo soo dhamaato doorashada” ayuu yiri Sayid Ibraahim oo ah xubin ka tirsan Guddiga Doorashooyinka dadban ee heer dowlad goboleed.
Doorashada aqalka Hoose ee maanta markale ka bilaabaneyso magaalada Baydhabo ayaa lagu wadaa in lagu soo doorto ilaa iyo 8 mudane, waxaana si aad ah loo adkeeyay amniga magaalada, si looga hortago dhagarta ay maleegayaan Al-Shabaab.
