Guddoomiyaha Xafiiska Arrimaha Xajka Soomaaliya, Dr. Khadar Daahir Suleemaan, ayaa shahaado-sharaf iyo mahadnaq guddoonsiiyay maamulka iyo dhakhaatiirta ka hawlgala Isbitaalka Boqor Cabdalla Medical City ee ku yaalla magaalada Jidda.
Dhakhaatiirta ayaa shahaadooyinkan ku muteystay kadib markii ay qaliinno lacag la’aan ah u sameeyeen qaar kamid ah Xujayda Soomaaliyeed ee sanadkan soo gutay waajibaadka Xajka.
Maamulaha Isbitaalka, Dr. Maxamuud Cabdisalaam Abuu Ramash, ayaa uga mahadceliyay Xafiiska Xajka Soomaaliya abaalmarinta dhiirrigelinta ah, isagoo xusay inay sii wadi doonaan garab istaagga iyo taageerada ay u hayaan Xujeyda Soomaaliyeed.
Guddoomiyaha Xafiiska Xajka Soomaaliya ee Boqortooyada Sacuudiga, Dr. Khadar Daahir Suleemaan, ayaa sidoo kale sheegay in dhammaan Xujaydii qaliinka lagu sameeyay ay caafimaad qabaan, wuxuuna bogaadiyay kaalinta muhiimka ah ee Isbitaalka Boqor Cabdalla uu ka qaato daryeelka caafimaad ee Xujeyda.
