Dugsigaan Hoose Dhexe oo ah mid loogu talagalay in si lacag la’aan ah wax loogu baro boqalaal carruur Soomaaliyeed ah oo aan helin fursado ay wax ku bartaan kuna nool deegaanka Qarsooni oo qiyaas ahaan magaalada Gaalkacyo kaga beegan ku dhawaad 40km dhanka waqooyi Bari ayaa markii u horeeysay laga hirgaliyay deegaankaasi
Munaasabadda furitaanka dugsigaan Hoose Dhexe oo ay ka qeyb galeen mas’uuliyiin ka tirsan Wasaaradda Waxbarashada Galmudug, masuuliyiinta Maamulka Degmada Gaalkacyo, Waxgarad iyo qeybaha kala duwan ee Bulshada deegaankaasi ayaa waxaa ugu horeyn ka hadlay qaar ka mid ah waxgaradka deegaankaasi kuwaasoo ka mahadceliyay hirgelinta iskuulkaan
Duqa Degmada Galkacyo ee Galmudug Xirsi Yuusuf Barre oo isna ka hadlay munaasabada ayaa ku booriyay waalidiinta degaankaasi in ay ubadkooda waxbaraan oo ay geeyaan xarunta waxbarasho ee deegaankooda laga hirgeliyay.
Ugu dambayn Guddoomiyaha Guddoonka Waxbarashada Gobalka Mudug Axmed Jaamac Aadan ayaa sheegay in markasta Wasaaradda Waxbarashada Galmudug oo kaashaneysa Wasaaradda Waxbarashada dowladda Federaalka Soomaaliya ay ku dadaali doonto sidii carruurta Soomaaliyeed wax loo bari lahaa, si loo hagaajiyo mustaqbalkooda.
