Xildhibaan Maxamed Axmed Beerey oo ka mid ah Xildhibaannada Golaha shacabka ayaa ku baaqay in la caawiyo dadka masaakiinta ah ee aan waxba heysan, maadaama aynu ku guda jirno bisha barakeysan ee Ramadaan, isla markaana ay nagu soo fool leedahay munaasabadda ciidul fitriga.
Xildhibaan Beereey oo la hadlay Radio Muqdisho ayaa sheegay in shirka golaha ee maanta uu ahaa in guddoonka ay si rasmi ah ula wareegaan mas’uuliyadda loo doortay, isla markaana wixii hadda ka dambeeya ay Xildhibaannada Golaha guda geli doonaan gudashada waajibaadka loo igmaday oo ay ugu horeyso dib u eegidda miisaaniyadda iyo doorashada Madaxweynaha.
“4ta bisha markii la isku soo labto waxaa la dhisi doonaa Guddigii qaban qaabin lahaa doorashada Madaxweyanha”. Ayuu yiri Xildhibaanka.
Xildhibaan Maxamed Axmed Beerey ayaa xusay inay lagama maarmaantahay in shacabka Soomaaliyeed ay is caawiyaan oo ay wax siiyaan kuwooda aan waxba heysan lagana farxiyo carruurta agoonta ah iyo kuwa kaleba.
Xildhibaanka mar uu ka hadlayay doorashada kadib qorshe howleedka horyaala ay tahay in uu kormeer ku tego deegaan doorashadiisa, si uu ugu kuurgalo baahiyaha ka jirta deegaanka laga soo doortay, isagoo balan qaaday in uu hirgelin doono adeegyada Caafimaadka, Waxbarashada iyo baahiyaha kale ee dhanka nolosha ah.
