Xildhibaanada Aqalka sare ee laga soo doortay Maamul Goboleedka Hirshabeelle oo shir jiraa’id ku qabtay xarunta Golaha Aqalka sare ayaa waxay kaga hadleen dhibaatada ka taagan Gobolka Hiiraan gaar ahaan magaalada Baladweyne Fataahada uu ka sameeyay Wabiga Shabeelle.
Waxayna Senatarada ay baaq u jeediyeen Dowladda Federaalka Soomaaliya,Hay’adaha samafalka,Ganacsatada iyo Aqoonyahnada Soomaaliyeed in gurmad deg deg ah lala gaaro Shacabka ka barakacay Xaafadahooda ka dib markii Biyaha Fatahaada ay ugu soo galeen.
Senator Maxamed Cusmaan Faarax oo ka mid ah Xildhibaanada Aqalka sare ee ka hadlay arrinta Baladweyne ayaa sheegay in dad badan guryahooda ay kaga barakaceen Fatahaada,islamarkaana loo baahan yahay in si deg deg ah loogu gurmado Shacabka Baladweyne.
“ Sidad la wada socotaan dhibaatada ka taagan maanta Gobolka Hiiraan gaar ahaan magaalada Baladweyne,halkaasi oo dhib aad u fara badan uu ka dhacay oo ah Fatahaada Wabiga,waxaad la socotaan in dadkii ay barakaceen,geedaha saaran yihiin ,musqulihii iyo biyihii isku darsoomeen,yaxaaskii oo haddii la rabo soo galayo,shirkaan waxaan u qabanay inaan baaq u dirno Dowladda Federaalka,arrintaan waa arrin Emergency ah oo deg deg ah oo u baahan wax qabad deg deg ah,” ayuu yiri Senator Maxamed Cusmaan Faarax.
Sidoo kale,Senator Naciimo Ibraahim Yuusuf oo ka mid ah Xildhibaanada Aqalka sare ee laga soo doortay Hirshabeelle ayaa baaq u dirtay Dowladda Federaalka ah,Beesha caalamka,Dowladaha deriska iyo aduunka oo dhan iney caawinaad la soo gaaraan dadka ku dhaqan deegaanada Hirshabeelle gaar ahaan magaalooyinka Baladweyne iyo Jowhar oo saameyn ay ku yeesheen Fatahaada Wabiga Shabeelle.
Senator Naciimo Ibraahim Yuusuf ayaa tilmaantay in Fatahaada ay si gaar ah saameyn ugu yeesheen Qoysaska danta yar sida Haweenka iyo Carruurta oo aan heysan meel ay seexdaan waxay cunnaan,islamarkaana Biyaha ay ka dhalan karaan cuduro halis ah,iyadoona Dowladda Federaalka si deg deg ah uga codsatay in Shacabkaasi loo gurmado.
Senator Cismaan Axmed Macow” Waxaan mar kale ku adkeynayaa in Dowladda Federaalka,Beesha caalamka Hay’adaha caalamiga ah iyo kuwa maxaliga ah,Culimada Soomaaliyeed,Ganacsatada iyo qof kasta oo Ilaahey wax siiyay maanta waxay taagan tahay maalintii wax lala baxayay oo sadaqada ay waajibtay,waxaana soo jeedineynaa in Bulshada Soomaaliyeed ay isku gurmadaan “ Soomaaliya wey isku gurman jirtay,’ Masiibadii dhacday 14-kii October beesha caalamka nooma gurman anagaa isku gurmanay, Soomaaliya waxaan leeyahay maanta shanta qaarad Aduunka meel walba ay joogto Shacabka Hiiraan maanta Gurmad ayay u baahan yihiin”.
Madaxweynaha Maamulka Hirshabeelle Mudane Maxamed Cabdi Waare oo ku sugan magaalada Baladweyne ayaa Dowladda Federaalka iyo Hay’adaha samafalka ugu baaqay in wax laga qabto xaalada ka taagan magaalada Baladweyne lana caawiyo dadka barakacay.
Ugu danbeyntii,Dowladda Federaalka Soomaaliya ayaa wata dadaalo loogu gurmanayo Shacabka magaalada Baladweyne gaar ahaan kuwa ay Fatahaada ay saameynta ka soo gaartay.
