Mudanayaasha labada aqal ee dawlad goboleedka Galmudug laga soo doorto shir ay isugu yimaadeen maanta, waxey walaac ka muujiyeen xaaladda xasilooni-darrada siyaasadeed ee ka soo korortay dawlad goboleedka Galmudug, taasoo abuuraysa qalqal iyo jahwareer hor leh xilli deegaanada Galmudug ay ka jirto duruufo adag oo isugu jira abaaro iyo colaad.
Mudanayaasha Labada aqal waxey ayagoo dhowraya madax-banaanida hey’daha dawlad goboleedka Galmudug, shuruucda iyo dastuurka Galmudug, ixtiraamayana golayaasha kala duwan ee maamulkaas, isla markaana garowsan mas’uuliyadda ka saaran horumarka iyo ilaalinta xasiloonida Galmudug, waxay ka digayaan falalka xildhibaanada Galmudug qaarkood & dad danaystayaal ahi ay horboodayaan ee lagu abuurayo qaska iyo qalalaasaha, kuwaasoo ay muuqato in ay lid ku yihiin jiritaanka iyo horumarka Galmudug, ayna ka faa’ideysanayaan dad cadow ku ah horumarka iyo xasiloonida Galmudug.
Mudanayaasha Labada aqal ee qaranka u matala Galmudug waxay si cad uga soo horjeedaan tallaabadii tiro xildhibaano ah taariikh 10-kii Janaayo 2017, shir ay ku qabteen xarun aan xaruntoodii aheyn ayadoo kalfadhigii baarlaamku xirnaa, ayna ku andacoodeen in ay xilka uga qaadeen madaxweynaha Dawlad goboleedka Galmudug, taasoo aheyd mid lagu degdegey, siyaasadeysneyd, dastuurka hareermarsaneyd, isla markaana ay gadaal ka riixayeen shakhsiyaad dano & damac siyaasadeed leh, oo u bareeray in ay majaxaabiyaan dawlad goboleedka curdinka ee Galmudug ee dadka Galmudug ay wada og yihiin dhibkii lagu dhisay iyo qiimaha ay ugu fadhido, falalka noocan ah haddii aan si wadajir ah looga hortagin waxey abuuri karaan qalalaase siyaasadeed oo ku fidi kara dawlad goboleedyada kale, xilli dalku ku jiro doorashooyin.
Mudanayaasha labada aqal waxay soo dhoweynayaan wadahadalka u furmay xildhibaanada Galmudug iyo madaxweynaha, kaasoo aan rajeyneyno in uu wadada u xaari doono isfaham iyo wada shaqayn horseedi doona xasilooni siyaasadeed oo dhex marta xildhibaanada iyo madaxda Galmudug, ayadoo mudanayaasha labada aqal ee heer federaal ay diyaar u yihiin in ay kaalin muuqata ka cayaaraan tallaabo kasta oo lagu xalinayo tabashooyinka xildhibaanada.
Gabagabadii, Waxaan waxgaradka reer Galmudug, hey’adaha kala duwan ee maamulkaas ugu baaqaynaa ilaalinta shuruucda iyo dastuurka u degsan Galmudug iyo in laga wada shaqeeyo horumarka iyo baraaraha shacabka Galmudug, ayadoo aan adkayneyno lagama maarmaanimada in aan xoogga isugu geyno gurmad u sameynta dadka iyo duunyada abaaruhu ku habsadeen ee ku nool deegaanada Galmudug, taasoo ka turjumaysa mas’uuliyadaha aan umadda u heyno iyo dareen bani’aadamnimo.
