Golaha Aqalka Sare ee Baarlamaanka Federaalka Soomaaliya ayaa ansixiyay Hindise-sharciyeedka Xafiiska Hanti-dhowrka Guud ee Qaranka.
Kulankii 36aad ee Kalfadhiga 6aad oo uu shir Guddominayay Guddomiyaha Aqalka Sare Senator Cabdi Xaaahi Cabdullaahi ayna goob joog ka ahaayeen Guddomiye Ku-xigeenka 1aad ee Aqalka Sare Senator Abshir Maxamed Axmed iyo Guddomiye Ku-xigeenka 2aad ee Aqalka Sare Senator Moowliid Xuseen Guhaad ayaa looga hadlay Akhrinta 3aad ee Hindise-sharciyeedka Hanti-dhoowrka Guud ee Qaranka iyo Akhrinta 2aad ee Hindise -sharciyeedka Duulista Rayidka.
Guddomiye ku-xigeenka Guddiga Dhaqaalaha, Maaliyadda, Ganacsiga, Warshadaha, Isgaarsiinta iyo Dalxiiska Senator Deeqa Xasan Xuseen ayaa Golaha ka hor akhrisay warbixinta Akhrinta 3aad ee Hindise-sharciyeedka Xafiiska Hanti-dhoowrka Guud ee Qaranka.
Shirka Golaha Aqalka Sare waxaa ka soo qeyb galay Hanti-dhowraha Guud ee Qaranka mudane Maxamed Maxamuud Cali (Afgooye).
Dood dheer kaddib Xildhibaannada Golaha Aqalka Sare ee Baarlamaanka Federaalka Soomaaliya ayaa meel mariyay Hindise-sharciyeedka Xafiiska Hanti-dhowrka Guud ee Qaranka.
“Waxaa Ogaalatay 25 Senator, waxaa diiday 4 Senator, mana jirin wax ka aamusay sidaas ayuuna sharci ku yahay” ayuu yiri Guddoomiyaha Golaha Aqalka Sare ee baarlamaanka Federaalka Soomaaliya Senator Cabdi Xaaahi Cabdullaahi.
