Kulanka Mudanayaasha Baarlamaanka Federaalka Soomaaliya oo uu shir guddoominayay Guddoomiyaha Golaha Shacabka Mudane Maxamed Mursal Sheekh Cabdiraxmaan ayaa ugu horeyn ka tacsiyadeeyay dadkii waxyeelada ka soo gaartay weerarkii maleeshiyaadka Al-Shabaab xalay ka geysteen Hotelka SYL.
Xildhibaannada waxa ay sidoo kale ka hadleen fatahaad uu sameeyay Webiga Shabeelle, gaar ahaan Degmada Afgooye, kuwaasi oo ku baaqay in gurmad deg deg ah la gaarsiiyo, maadaama fatahaaddu ay barakacisay qoysas horleh.
Guddoomiyaha Golaha Shacabka ee Baarlamaanka Federaalka Soomaaliya Mudane Maxamed Mursal Sheekh Cabdiraxmaan ayaa sheegay in guddi gaar ah loo saari doono arrinta fatahaadda ee degmada Afgooye, kuwaasi oo la xiriiri doono cidda ay quseyso.si gurmad beni’aadannimo loo gaarsiiyo dadka ku barakacay fatahaadda, isla markaana Guddoonka Baarlamaanka uu la shaqeyn doono guddiga.
Intaas kaddib Xildhibaannada Golaha Shacabka ayaa sii amba qaaday ka doodista Akhrinta labaad ee sharciga doorashooyinka Qaranka, kuwaasi oo dhiibtay aragtidooda ku aadan wax ka badalka qaar ka mid ah qodobada sharciga.
Mudane Maxamed Mursal Sheekh Cabdiraxmaan Guddoomiyaha Golaha Shacabka baarlamaanka Federaalka Soomaaliya oo kulanka soo xiray ayaa uga mahadceliyay Xildhibaannada sida hufan ee ay aragtidooda ku biirinayaan sharciga Doorashooyinka.
“Xildhibaannada waxaan ka codsaneynaa in wixii fikir ah ee ku soo dhaca inta lagu guda jiro akhrinta labaad ee Hindise Sharciyeedka Sharciga Doorashooyinka Qaranka inay soo qortaan oo ay u gudbiyaan guddiga, ka hor inta aan loo gudbin akhrinta saddexaad” ayuu yiri Guddoomiyaha Baarlamaanka Soomaaliya.
