Ajendaha kulanka Guud ee Golaha Shacabka oo uu shir Guddoominayay Guddoomiye ku-xigeenka labaad ee Golaha Shacabka Mudane Mahad Cabdalla Cawada waxa uu ahaa akhrinta koowaad ee Hindise Sharciyeedka wax ka bedelka sharciga Hanti-dhowrka guud ee Lr yahay 34 ee soo baxay 14/04/1972-dii.
Wasiiru dowlaha Wasaaradda Maaliyadda ee Soomaaliya Mudane Maxamuud Xayir Ibraahi ayaa Xildhibaannada Golaha Shacaka u akhriyay hindise sharciyeedka Hanti-dhowrka guud, kaasi oo uu u sheegay in uu yahay mid muhiim ah.
Qaar ka mid ah Xildhibaanada Golaha Shacabka ayaa aragtidood ka dhiibtay Hidise Sharcieedkan, kuwaasi oo qaarkood soo jeediyay in la meel mariyo markuu dib u habeyn ku sameeyo guddiga Maaliyadda ee Golaha.
Mudane Mahad Cabdalla Cawada Guddoomiye kuxigeenka labaad ee Golaha Shacabka oo kulanka soo xiray ayaa sheegay in Hindise sharciyeedkan loo gudbiyay Guddiga Maaliyadda iyo Miisaaniyadda ee Golaha Shacabka si ay Golaha ugu soo celiyaan markii ay waajibaadkooda ka gutaan, iyagoo la kaashanaya Wasaaradda Maaliyadda ee Xukuumadda Soomaaliya.
