Maxamad Daahir Xubin ka Mid ah gudiga Madaxa Banaan ee Doorashooyinka oo la hadlay Warbaahinta Qaranka ayaa sheegay in safarkooda uu yahay mid ay latashiyo ku saabsan Doorashada Soomaaliya 2020 ay kula sameynayaan Qeybaha kala duwan ee Bulshada ku nool magaalada Jowhar, iyagoo hore u soo booqday Gobalada Maamulada Koonfur Galbeed iyo Jubbaland.
Sidoo kale Xubnahan Guddiga madaxa banaan ee Doorashooyinka Qaranka ayaa dhageysanaya aragtida Bulshada qeybaheeda kala duwan iyagoona weydiinaya sida dalka ay kaga dhici karo Doorasho qof iyo cod iyo sida ugu fudud ee loo suurta galin karo.
Kulamadan ayaa ujeedadooda tahay wacyigelin iyo in dadka la baro hanaanka loo mari doono Doorashada qof iyo cod oo markii ugu horeysay la filayo inay ka dhacdo Soomaaliya.
Madaxda qaranka iyo kuwa dowlad gobaleedyada ayaa guddiga Doorashooyinka ka dalbaday in lasoo daraaseeyo qaabka doorashada ay u dhici karto iyo bulshada la baro qaabka ugu sahlan ay uga qeyb qaadan karaan, waxaana fulinta arintaasi dadaal xoogan ugu jira Guddiga madaxa banaan ee Doorashooyinka Qaranka oo Muqdisho iyo Gobalada dalka ka wada wada tashiyo arintaasi ku saabsan.
