Taliyaha guud ee ciidanka dalka Suudaan, Cabdifataax Al-Burhan iyo ra’iisal wasaarihii la afgenbiyay Cabdallah Xaamduuk ayaa maanta heshiis ka gaaray dhibaatadii ka dhalatay afgenbigii dalkaas ka dhacay 25-kii bishii hore.
Heshiiskaan ayaa yimid kadib markii shacabka Suudaan sameeyen bannaan baxyo looga soo jeedo go’aanka ciidamada iyo sidoo kale cadaadiska beesha caalamka oo kasoo horjeesatay afgenbiga ciidamada.
Heshiiskan oo ay goob-joog ka ahaayeen madax kala duwan oo isugu jirta militariga iyo siyaasiyinta dalkaas ayaa ka koobnaa 14 qodob oo ay ugu muhiimsanaayeen in laga laabto go’aankii ay ciidamadu xilka uga qaadeeen ra’iisal wasaare Xamduuk iyo in lasii daayo dhammaan madaxdii iyo siyaasiyiinti la xiray maalmihii lasoo dhaafay.
Qodobada la kala saxiixday, waxaa kale oo ka mid ah in baaritaan lagu sameeyo dadkii la dilay intii bannaan baxyadu ka socden dalkaas lana maxkamadeeyo mas’uuliyiintii ka danbeeyay dilkooda.
Labada dhinac ayaa ballan qaaday inay ka wada shaqayn doonaan dhamaystirka hannaanka dimuqraadiyadda iyo in Suudaan la gaarsiiyo doorasho xor ah oo nabad ah.
