Wasiirka Warfaafinta dhaqanka iyo Dalxiiska ee Xukuumadda Federaalka Soomaaliya Mudane Maxamed Cabdi Xayir Maareeye ayaa bogaadiyay howlaha shaqaalaha Wasaaradda Warfaafinta ay u hayaan bulshada Soomaaliyeed, isagoo dhanka kale faah faahin ka bixiyay warsaxaafadeedkii ay dowladda kaga hadleysay dhibaatada lagu hayo muwaadinta Sooomaaliyeed ee dalka Koonfur Afrika ku nool.
“Shaqo maalmeedka caadiga ah ee aan ka hayo Wasaaradda ayaan idinku soo booqday Istuudiyaha, waxaan bogaadinayaa howlaha 24-ka saac ee ay Shaqaalaha Wasaaradda u hayaan bulshada Soomaaliyeed ee dhanka wacyigelinta, runtii shalay Warsaxaafadeed ayay Wasaaraddu ka soo saartay in dadkeeda lagu waxyeeleeyo dalka Koonfur Afrika, waxaana ka codsanaya inay dowladda Koonfur Afrika damaanad qaaddo shacabka Soomaaliyeed iyo hantidooda”.ayuu yiri Wasiirka Warfaafinta oo hadalkiisa ku daray “Waxaan sidoo kale la xiriirna Safaaradda aan ku leenahay dalka Koonfur Afrika, kuwaasi oo aan ku amaarnay inay u adeegaan ganacsatada Soomaaliyeed”.
Wasiirka ayaa hoosta ka xariiqay in qadiyadda Midab takoorka lagu hayay shacabka Koonfur Afrika ay dowladda iyo Shacabka Soomaaliyeed door muhiim ka qaateen sidii loola dagaalami lahaa midab kala sooca, waxaana uu intaa ku daray in abaalka Soomaaliya loogu badalo dil iyo boob loo geysanayo Jaaliyadda Soomaaliyeed aysan ahayn mid lawada sugayay.
Wasiirka Warfaafinta dhaqanka iyo Dalxiiska ee Xukuumadda Federaalka Soomaaliya Mudane Maxamed Cabdi Xayir Maareeye ayaa sheegay in dowladda Soomaaliya ay si toos ah ula hadashay madaxda Koonfur Afrika, isla markaana ay ku dadaali doonaan sidii dhibaatooyinka wax looga qaban lahaa.
Halkan ka dhageysoย
