Ra’iisul Wasaaraha Xukuumadda Federaalka Soomaaliya Mudane Cumar Cabdirashid Cali Sharmarke ayaa ka tacsiyeeyey geeridii ku timid Allaha u naxariistee Marxuum Xuseen Maxamuud Muuse (Xuseen Baantuu) oo ka mid ahaa mudaneyaasha baarlamaanka oo maanta ku geeriyooday hooygiisa oo ku yaalla Muqdisho.
“Allaha u naxariistee Marxuum Xuseen Baantuu waxa uu u soo shaqeeyey qaranka Soomaaliyeed, xilliyo duruuftoodu kala duwan tahay, waxana uu ahaa nin si weyn u rumaysan Soomaaliya oo nabad ah oo horumartay, dadkeeduna ku nool yihiin midnimo, caddaalad iyo barwaaqo. Waxa uu ahaa geesi aan aragtidiisa la gabban oo dood-yaqaan ah marka lagu jiro Baarlamanka iyo xilliyada kale ee laga hadlayo arrimaha Soomaaliya” ayuu yiri Ra’iisul wasaare Cumar Cabdirashiid.
Wasiirka Warfaafinta ee xukuumadda Soomaaliya Mudane Maxamed Cabdi Xayir Maareeye oo baarlamaanka iyo shacabka Soomaaliyeed uga tacsiyadeeynayay geerida Xildhihaanka ayaa yiri: “Geeridu waa xaqa, qof walbana waa dhimanayaa, waxaan halkaan tacsi tiiraanyo leh uga dirayaa qoyska, ehelada iyo dhammaan shacabka Soomaaliyeed geeridii naxdinta lahayd ee ku timid Marxuum Xildhibaan Xuseen Baantuu oo ku geeriyooday Muqdisho, waxaana ilaahay uga baryeeynaa inuu Kitaabkiisa ka siiyo gacanta midig, kana waraabiyo Janatul Firdowso,”.
Waxaa kaloo tacsi taa la mid ah diray Xubno ka tirsan labada gole ee dowladda oo ehelada iyo qoyska uu ka geeriyooday Marxuumka uga baryay in uu samir iyo Iimaan Alle ka siiyo.
Inaa-Lillaahi-Waa-Innaa-Ileyhi-Raajicuun
