Munaasabad isugu jirta casho sharaf iyo sagootin ayaa xulka Qaranka Soomaaliya oo ka qayb galayay koobka bariga iyo bartamaha Afrika oo sanadkan ka dhacayay dalka Uganda, gaar ahaan caasimadiisa Kampala loogu qabtay xalay mid ka mid ah maqaayadaha ugu waa wayn ee Soomaalida Kampala ku leedahay oo lagu magacaabo Cafe Java’s .
Munaasabadan ay soo abaabuleen qaar ka mid ah ganacsatada Soomaaliyeed ee Kampala ka ganacsada ayaa waxa ka soo qayb galay madaxda ururka cayaaraha Soomaalida ee Uganda, ganacsato iyo Madaxda xariirka kubadda cagta Soomaaliyeed Mudane Cabdiqani Saciid Carab.
Qaar ka mid ah madaxda Jaaliyadda ayaa uga mahadqanay xulka Qaranka dadaalkii ay sameeyeen intii ay ciyaarayeen korna u qaadeen sumcadda qarankeena Soomaaliya.
Cumar Cabdullaahi oo ah ciyaaryahankii dhalliyay goolkii Soomaaliya uga badisay xulka Burundi oo ka hadlay casha sharaftan ayaa si guud ugu mahadceliyay Soomaalida ku nool Uganda sidii qiima badnayd ee u garab istaageen markii ay baratanka kula jireen kooxihii kale.
Cabdiqani Saciid Carab Guddoomiyaha xariirka kubadda cagta oo isna munaasabadan hadal kooban ka jeediyay ayaa sheegay in waajibkii lagu lahaa Jaaliyadda ee ahaa in Qarankooda garab istaagaan.
Cabdiqani ayaa u sheegay Soomaalida in ciyaarahii Soomaaliya la ciyaartay kooxaha kale ay ka xiiso badnaayeen kuwa dalalka kale ciyaarayeen oo Soomaaliya marka ay ciyaaraysay garoonka lasoo booxinayay oo ticket aad u badan la iibsaday, ayna amaaneen maamulka koobka bariga iyo bartamaba afrika sida Jaaliyadda Soomaalida ay xulkooda u taageereen.
Ugu dambayntii munaasabadan ayaa kusoo gabagabowday jawi aad u qurux badan iyagoo dhawaan ciyaartooyda xulka qaranka ay ku kala laaban doonaan dalalkii ay kasoo kala yimaadeen
Fiidow Mohamud Fiidow
Kampala Uganda
