Munaasbad lagu xusayay Maalinta Caalamiga ah ee Cuntada oo ku beegneed 16-ka October isla markaana ay soo qaban qaabisay Wasaaradda Beeraha ayaa maanta lagu qabtay magaalada Muqdisho, waxaana ka qeybgalay Wasiirka Shaqada iyo Arimaha Bulshada Xukuumada Somaaliya Mudane Cabdiweli Sheekh Ibraahim Muudey, Wasiirkii hore ee Beeraha Cabdi Axmed Baafo, Agaasimaha Guud ee Wasaaradda Beeraha Maxamuud Maxamed Maxamuud iyo Mas’uuliyiin kale.
Dhamaan Mas’uuliyiintii Munaasbadda ka hadlay ayaa waxa ay soo jeediyeen in la horumariyo Beeraleyda Somaaliyeed si dalka uu u gaaro isku filnaasho dhanka wax soo saarka ah.
Agaasimaha Guud ee Wasaaradda Beeraha Xukuumada Somaaliya Mudane Maxamuud Maxamed Maxamuud oo ka hadlayay waxsoo saarka beeraha ayaa sheegay in hay’adda cunada iyo beeraha u qabailsan Qaramada Midoobay ee FAO ay kula heshiiyeen inay beeraleyda Somaaliyeed ka iibsato raashinka gargaarka ah ee dadka loo qeybinayo oo markii hore Dibadda laga keeni jiray.
Wasiirkii hore ee Beeraha Mudane Cabdi Axmed Baafo oo munaasabadda ka hadlayay ayaa ku taliyay in la helo maalgalin dhinaca beeraha ah si loo horumariyo tacabka beeraha iyo beeraleyda Somaaliyeed, taasi oo horseedi karta in lagu tartamo wax soo saarka nuucyada kala duwan ee dalaga beeraha.
Wasiirka Shaqada iyo Arimaha Bulshada ee Xukuumada Soomaaliya Mudane Cabiwali Sheekh Ibraahim Muudey ayaa ugu baaqay Hay’adda Cunada iyo Beeraha u qabailsan Qaramada Midoobay ee FAO inay caawiso beeraleyda Somaaliyeed oo ay ka gacansiiso inay soo saraan dalag fara badan, taasi oo uu Wasiirku tilmaamay inay sare u qaadeyso wax soo saarka dalka.
Gabagabadii Munaasbadda lagu xusayay Maalinta Caalamiga ah ee Cuntada ayaa Wasaaradda Beeraha waxa ay u qeybisay dadkii munaasbadda kasoo qeybgalay inkabadan 10,000 –(Toban kun) oo dhir ah oo loogu talagay in qof kasta uu guriigisa ku beero dhirta.
