Munaasabaddan lagu maamuusaayey maalinta Nabadda Adduunka oo ay soo qaban qaabiyeen Maamulka Degmada Jowhar ee caasimadda Dowlad Goboleedka HIrshabeelle ayaa waxaa ka qeyb galay mas’uuliyiin ka tirsan Dowlad Goboleedka hirshabelle, Maamulka Gobalka Shabelaha Dhexe iyo qaybaha kala duwan ee bulshada.
Guddoomiye ku-xigeen amniga Degmada Jowhar Xasan Barrow Bacor, Duqa Degmada Jowhar Saalax Muudeey Cali, Sidoo kale Maxamed Siyaad Cali Canjeex oo ah Taliyaha ciidamada booliska saldhiga Degmada Jowhar ayaa si wada jir uga hadlay ahmiyadda ay leedahay maalinta caalamiga ah ee Nabadda Adduunka, isla markaaana laga wada shaqeeyo Nabadda.
Ugu dambeyn Wasiir ku-xigeenka Wasaradda dhallinyarada iyo Cayaaraha ee dowlad Gobaleedka Hirshabelle Cumar Maxamed Cumar Gaaboow oo goobta ka hadlay ayaa sheegay in nabaddu ay qeyb ka tahay nololosha, aadanaha., waxaana uu shacabka ku nool deegaannada Hirshabeelle gaar ahaan caasimadda Jowhar inay xoojiyaan ka shaqeynta Nabadgelyada, lagana hortago cidkasta oo amni darro ka shaqeyneyso.
Munaasabadda ayaa intii ay socotay waxaa goobta lagu soo bandhigay gabayo, tix, buraanbur iyo heeso ka turjumayey maalinta Nabadda Adduunka qiimaha ay leedahay.
