Munaasabadaan lagu maamusayay 59 sano guuradii ka soo wareegtay markii ay Gobolada Koofureed ay xornimada ka qaateen gumeystihii Talyaaniga iyo israacii Gobolada Waqooyi iyo kuwa Koofureed ee dalkeena oo ku began 1-Luulyo ayaa maanta lagu qabatay Galkaacyo.
Munaasabada oo ay si wadajir ah usoo agaasimeen maamulada Gobalka Mudug ee Puntland iyo Galmudug ayaa waxaa ka qeyb galay Xildhibaanno ka tirsan labada Aqal ee Baarlamanka Federaalka Soomaaliya, mas’uuliyiinta Gobalka Mudug ee Puntland iyo Galmudug iyo boqalaal dadweyna ah.
Guddoomiyeyaasha Gobalka Mudug ee Puntland iyo Galmudug Axmed Muuse Nuur iyo Cabdiraxmaan Cali Diiriye oo ugu horeyn munaasabada ka hadlay, ayaa sheegay maanta inay tahay maalin ku weyn Ummadda Soomaaliyeed ayna ku faraxsan yihiin in markii u horeysay bur burkii kaddib si wadajir ah ay uga qabsoonto magaalada Galkaacyo.
Munaasabada oo intii ay socotay ay ka hadleen xubno matalaya ururrada dhallinyarada iyo Haweenka ayaa waxaa gunaanadkii ka hadlay qaar Xildhibaannada Barlamaanka Federaalka Soomaaliya kuwaasi oo ay ka mid ahaayeen Xildhibaan Khaalid Macoow, Xildhibaan Xaniifo Maxame Ibraahim Xaabsade, Xildhibaan Axmed Macalin Fiqi iyo Xildhibaan Cali Jaamac Jingali oo isagu munaasabadda soo xiray, kuwaasi oo bulshada Gobolka Mudug ugu baaqay inay xoojiyaan Nabadgelyada Gobolka, ayna ka hortagaan cidkasta oo dooneysa inay carqaladeyso horumarka iyo amniga ka jirta magaalada Gaalkacyo.
