Xuska Sanad Guurada 68aad ee Jamhuuriyadda Shiinaha ayaa maanta lagu qabtay Muqdisho, iyadoo ay ka qeyb galeen Ku-simaha Madaxweeynaha ahna Guddoomiyaha Golaha Shacabka Mudane Maxamad Sheekh Cismaan Jawaari, Ku-simaha Ra’iisulwasaaraha Dalka ahna Ra’iisulwasaare ku xigeenka dalka Mudane Mahdi Maxamad Guuleed Khaddar, xubno ka tirsan labada gole ee Aqalka sare iyo Golaha Shacabka, Wasiiro, diblomaasiyiin iyo marti sharaf kale.
Ugu horayn waxaa meesha ka hadlay Safiirka Shiinaha u fadhiya Soomaaliya Mr Chin Lin waxaa uu sheegay inay waxbadan ka qabteen xariirka Soomaaliya iyo Shiinaha sida u gurmashada dadkii ay abaarahu saameeyeen oo ay ku bixyeen lacago iyo fulinta mashaariic horumarineed, ayna diyaar u yihin inay sii wadayaan hirgelinta mashaariic kale.
Guddoomiyaha Golaha Shacabka Mudane Maxamad Sheekh Cismaan Jawaari ayaa sheegay in xariirka Soomaaliya iyo Shiinaha uu ahaan mid aad ugu wanaagsan ka hor burburkii dalka, ayna doorween ku lahaayeen fulinta mashaariic horumarineed oo laga fuliyay Dalka, Isagoo si gaar ah uga codsaday in Madaxweeynaha Shiinaha uu gaarsiiyo in Soomaaliya ay markasta diyaar u tahay inay ka faa’iidaysato fursadaha horumarineed ee Shiinaha ka fulinayaan dalka iyo xoojinta xariirkii soo jireenka ahaa ee labada dalka.
Mudane Maxamed Sheekh Cismaan Jawaari Ku-simaha Madaxweynaha Dalka ayaa ugu hambalyeeyay Dalka Shiinaha sanad guuradii 68aad ee ka soo wareegatay markii la aasaasay Jamhuuriyadda Shiinaha.
Dawladaha Soomaaliya iyo Shiinaha ayaa leh xariir soo jireen ah, aydoo lagu xasuusto dawladda Shiinaha dhismaha Golaha Murtida iyo Madadaallada (National Theater) Garoonka kubadda Cagta ee Stadium Mogadishu iyo mashaariic kale balse waxii ka danbeeyay buburkii dawladii dhexe Soomaaliya 1990 ayaa waxaa meesha ka baxay mashaariicdaasi, waxaase hada muuqda ifaafaalo ku aadan soo noolaynta xariirkii soo jireenka ahaa ee u dhaxeeyay labada dal.
