Weerar naftii halignimo ah oo ka dhacay Masjid ku yaalo Waqooyi bari dalka Nigeria ayaa dilay ugu yaraan 11-Qof,sida wararka ka imaanaya dalkaasi ay sheegayaan.
Weerarka ayaa ka dhacay magaalada Gamboru,Gobolka Borno oo ku dhow xuduuda dalkaasi uu la wadaado dalka Cameroon,waana halka weeraro dhowr ah ay ka fuliyeen Kooxda Boko Haram.
Dad goob joogayaal ah ayaa sheegaya in Qaraxa uu dhacay xilli dadka ay ku jireen Tukashada Salaadda Subax.
” Waxaan ku sii socday Salaadda Subax,ka dib waxaa maqlay dhawaqa Qarax culus oo ka dhex dhacay Masjidka,” sidaasi waxaa Reuters u sheegay Ali Mustapha oo ka mid ah shaqaalaha gargaarka.
Wuxuu yiri dib ayaan guriga ugu soo laabtay si aan uga badbaado Howlgalka Boko Haram,sida uu yiri Ali Mustapha.
Isagoo hadalkiisa sii wata Ali Mustapha ayaa Yiri” Masjidka wuu bur buray,sidoo kalena gabi ahaantiisa wuu gubtay,”
Saacado ka dib ayaa dadkii goobta ka agdhawaa waxay bilaabeen howlgal badbaadin ah,waxaana goobta laga soo saaray meydka 11-Qof oo uu ku Qofka ismiidaaminta sameeyay oo tirada guud ka dhigaya 12-Qof.
Ilaa iyo hadda ma jirto koox sheegatay mas’uuliyadda weerarka,balse marka loo eego goobta uu ka dhacay iyo nuuca weerarka ayaa calaamad u ah Boko Haram,sida warbaahinta dalkaasi ay qorayaan.
