126—ruux oo horay uga tirsanaa kooxda Al-Shabaab, isla markaana kal hore isku soo dhiibay Maamulka Koonfur Galbeed ayaa magaalada Beydhabo loogu soo gabagabeeyay barnaamij dhaqan-celin ah, kaddib markii ay soo dhameysteen daruus la xiriirtay ka qeyb qaadashada horumarka dalka iyo maareynta noloshooda.
Xaflad ka dhacday xarunta Dhaqancelinta Maleeshiyada ee magaalada Beydhabo, waxaa ka qeybgalay xubno ka socday Maamulka Dowlag Goboleedka Koonfur Galbeed, Qaramada Midoobay, Ururka Caalimiga ah ee Muhaajiriinta iyo AMISOM.
Madaxa Hub ka Dhigista iyo Dhaqab-celinta dowlad Goboleedka Koonfur Galbeed Ilyas Cali Nuur oo ka hadlay soo gabagabeynta xafladdaasi ayaa sheegay in lagu guuleystay qabsoomidda barnaamijka dhaqan celinta, isla markaana ay soo baxeen dhallinyaro maskax ahaan iyo jir ahaan diyaar u ah in ay wax la qeybsadaan bulshada Soomaaliyeed inteeda kale.
Xafiiska Qaramada Midoobay ee Soomaaliya, Ururka Caalamiga ah ee Muhaajirinta iyo Dowladda Jarmalka ayaa magaalooyinka Muqdisho, Beledweyne, Kismaayo iyo Baydhabo ka hirgeliyay xarumo lagu dhaqan-celinayo dhallinyarada ka soo baxsada kooxaha hubeysan.
