Waa markii ugu horeysay tan iyo burburkii dowladii dhexe 30 sano kaddib ardayda ay u fariistaan imtixaanka shahaadiga ah ee Dugsiga Dhexe, Gobolka Bakool imtixaanka waxa sanakdan uga qeybgalay 218 arday, waxa lagu qabtay 3 degmo kuwaasi oo kala ah Waajid, Ceelberde iyo magaalo madaxda Bakool Xudur.
Munaasabadda dahfurka Imtixaanka fasalka 8aad dugsiga dhexe oo lagu qabtay degmada Xudur waxa ka soo qeybgalay Maamulka Gobolka, kan Degmada, bahda waxbarashada, Waaladiinta ardayda, Saraakiisha booliska iyo ardayda imtixaanka u fariisatay oo tiradoodu aheyd 99 arday oo ka kala socday dugsiyada Maama Geediya iyo Shodog, waxana imtixaanka lagu qabtay xaruunta dugsiga sare ee magaalada Xudur.
Ugu horeyn waxa ka hadlay Guddoonka Waxbarashada Degmada Xudur Aadan Axmed Maxamuud iyo Guddoomiyaha Arimaha Bulshada Degmada Xuddur Malaak Cabdiraxmaan, kuwaasi oo ardayda ku booriyay inay ku kalsoonaan naftooda.
Maamulayaasha Dugsiyada iyo marti sharaf dahfurka xafladda kadahlay ayaa ardayda u rajeeyey in ay ku guuleystaan imtixaanka ayna ku kalsoonyihiin tayada Waxbarashadooda.
Intii ay socotay munaasabadda dahfurka imtixaanka fasalka 8aad waxa goobta ka hadlay Guddoomiyaha waxbarashada Gobolka Bakool Cabduqaadir Nuur Cadow, Taliyaha qeybta booliska Gobolka Cornel Cabdullaahi Qadaafi iyo Guddoomiye ku xigeenka dhanka maaliyadda ee Gobolka Bakool Cabdulaahi Maxamed Nuur, kuwaasi oo si wadajir ah ardayda u rajeeyay inay ku guuleystaan imtixaanka, ayna muujiyaan aqoonta ay barteen.
