Maxaabiis tiradoodu gaareeyso ilaa 50 oo ku xirnaa xabsiyada magaalada Kismaayo ayaa maanta la sii daayay kaddib markii madaxweynaha maamulka Jubbaland uu cafis u fisiyay fadliga bisha Ramadan awgeed.
C/qaadir Aadan Cismaan oo ka mid ah saraakiisha amniga ee maamulka Jubbaland ayaa Radio Muqdisho u sheegay in sii deynta maxaabiista ay ka dambeysay kadib markii madaxweynaha maamulkaasi Axmed Madoobe uu ku amray in la sii daayo maxaabiista ku jirta xabsiyada magaalada Kismaayo ee ku eedeeysan dambiyada yar yar.
Sarkalkan oo hadalkiisa sii wata ayaa caddeeyay in maanta la sii daayay ilaa 50 maxbuus oo ku jirtay jeelasha kala duwan ee magaaladaasi, isagoo xusay in muddadii ay xirnaayeen dadkan ay xabsiga ku qaateen casharro wacyigelin ah oo ku aaddan sidii ay uga waantoobi lahaayeen falal dambiyeedyada.
